Qazaq qyzy Tileýqor Boshymova jarty ǵasyr ǵumyryn Qyrǵyz avıatsııasyna arnaǵan
ASTANA. QazAqparat - Kózinde jalyny bar, symbaty kelisken, kúlkisi árkimdi de tánti etetin 70 jastaǵy Tileýqor apa kez kelgen jas stıýardessanyń qasynda qysylmaı tura alady. Osydan 55 jyl buryn Qyrǵyz kógin alǵash baǵyndyrǵan qarshadaı ǵana qazaq qyzy jarty ǵasyr ómirin azamattyq avıatsııaǵa arnaǵan. QazAqparat tilshisimen áńgimelesken Tileýqor Boshymova aspanǵa ushsam degen asqaq armany týraly, sol armanǵa jeter joldaǵy qıyndyq pen qyzyqtary týraly estelikterin aıtyp berdi.
«Men Qyrǵyz Respýblıkasynyń Chýı oblysy Máskeý aýdanyna qarasty Túlek aýylynda týdym. Bul jerge ata-anam 30-shy jyldary Qaraǵandy oblysynan kóship kelgen eken. Keń dalada óstim, bala kezimde jylqy jaıyp, túıe baqtym. Sonda, aspannan ary-beri ushqan ushaqtardy kóp kóretinmin. 17 jasymda eń alǵash ret ushaqqa otyrǵan men «stıýardessa» degen maman ıesin alǵash ret kórdim. «Ne degen ádemi qyz!» dep tań qalǵan men «ózim de osylaı ushamyn» degen oıǵa keldim»,-deıdi bala armanyn eske alǵan Tileýqor apa. 
Alaıda, qazaq qyzynyń bul armany birden oryndala qoımaǵan eken.
«1959 jyly men Frýnze qalasyna keldim. Janymdaǵy qyzdardyń bireýi tigin tikse, ekinshisi toqymaǵa áýes edi. Al, meni ondaı dúnıeler qyzyqtyrmady, ushýǵa qumarlana berdim. Sóıtip, parashıýttan sekirý sportyna den qoıdym. 1964 jyly trolleıbýs aıaldamasynda turdym da ishimnen bir tilek tiledim: eger de birinshi ótken trolleıbýs teatrǵa qaraı bara jatsa, ártis bolamyn, eger, áýejaıǵa bara jatsa, avıatsııaǵa baramyn dedim. Birinshi trolleıbýs joǵary jaqqa, ıaǵnı, áýejaı baǵytyna qaraı júrdi. Oılanbastan, ushqyshtar ýchılışesine keldim, biraq, stýdentterdi irikteý aıaqtalyp qoıǵan eken. 
«Sizdi dıktor retinde qabyldaıyq, birneshe aıdan keıin ýchılışege oqýǵa aýystyramyz, dedi. Osylaısha, men azamattyq avıatsııadaǵy alǵashqy dıktor boldym. 1965 jyly ýchılışege aýysyp, stıýardessa atandym»,-deıdi T.Boshymova.
Oqý bitirgennen keıin Tileýqor Іzembekqyzy 17 jyl boıy kókte qalqydy. 20 myń saǵat boıy ushqan eken. Sol 17 jylda Qyrǵyz avıatsııasyndaǵy qazaq qyzy talaı qyzyqtardy bastan ótkeripti.
«Bir ret meniń qolyma 6 aılyq balany tastap ketti. Onyń anasy stýdent edi. Sondyqtan, Máskeýde qalyp, synaq tapsyrýy kerek boldy. Stýdent qyz balasyn maǵan qaldyrdy da Frýnze qalasynan týystary kútip alatynyn, telegramma da joldanyp qoıǵanyn aıtty. Frýnzege ushyp keldik, telegramma da joq, kútip alatyn ata-ana da joq, týys-týǵan da joq. Stýdent qyzdan kútip alatyn kisilerdiń adresin jazyp alǵanym sondaı jaqsy bolar ma, taksıge otyrdym da tıisti mekenjaıǵa keldim. Tańǵy saǵat 07-00 bolatyn. Esikti kishkene bala ashyp tur, ata-anam joq, bazarǵa ketken deıdi. Sonymen, ne kerek, balany aman-esen jetkizdim. Keıin, balanyń ata-ájesi meni taýyp alyp, alǵys aıtty»,-deıdi avıatsııa salasyna eńbegi sińgen Boshymova. 
Tileýqor Boshymovanyń otbasy da avıatsııa salasynda eńbek etedi eken. Joldasy Marat Bektenov halyqaralyq reısterdiń 1 sanatty ınjener-ushqyshy bolǵan eken. Jýyrda ǵana, 2017 jyldyń 7 qańtarynda Marat Bektenovtiń qurmetine onyń týǵan jeri - Qoıtas aýylynyń bir kóshesine Qyrǵyz Respýblıkasynyń ataqty ushqyshynyń esimi berilgen eken. 
Ushqyshtardyń otbasynda dúnıege kelgen balalar da ata-ana jolyn jalǵastyrǵan. Tileýqor Boshymova men Marat Bektenovtiń eki qyzy da qazir halyqaralyq reısterdiń stıýardessalary. Samat atty uldary «Qyrǵyzstan áýe joldary» atty áýe kompanııasynyń qyzmetkeri. Boshymovanyń 7-synypta oqıtyn nemeresi de avıatorlar dınastııasyn jalǵastyramyn deıdi eken.
Qyrǵyz Respýblıkasynyń azamattyq avıatsııasyna jarty ǵasyr ǵurmyryn arnaǵan Tileýqor Іzembekqyzy qazir Qyrǵyzstannyń azamattyq avıatsııa mýzeıin basqaryp otyr. 
Tileýqor Boshymova qoǵamdyq jumystarǵa da belsene atsalysqan adam. Kóp jyldardan beri qazaq dıasporasy tóraǵasynyń orynbasary, Qyrǵyzstan áıelderi kongressiniń múshesi. «Qyrǵyzstannyń eńbek sińirgen avıatory», «Qyrǵyzstannyń mádenıet úzdigi» sııaqty marapattarymen qatar, Qazaqstannyń jáne Reseıdiń marapattaryna ıe bolǵan.
