Qazaq qyzy Reseıdiń chempıony atandy
ASTANA. QazAqparat - Reseıdiń Astrahan qalasynda turatyn qazaq qyzy, halyqaralyq dárejedegi grossmeıster Janna Sarshaeva 64 sharshyly doıbydan eldiń eki dúrkin chempıony atandy.
Ol orys shahmaty boıynsha ótken chempıonat sheńberinde eki birdeı altyn medal jeńip aldy.
Janna aldymen asa jyldam oınalatyn oıynda jeti ret jeńiske jetip, eki matchty teń aıaqtap, 9 múmkindikten 8 upaı jınap, top basyna dara shyqty. Ol sondaı-aq jyldam oınalatyn kelesi oıynda 9 múmkindikten 7 upaı alyp, 28 qatysýshynyń arasynda birinshi orynǵa kóterilgen. Bul joly ol 7 ret utyp, 2 márte teń oınap, 1 ret utylǵan.
Janna Sábıtqyzy Sarshaeva 1993 jylǵy 29 sáýirde Astrahan oblysy Volodar aýdanynyń Volodar selosynda týǵan. Bul ýaqytqa deıin Reseıdiń qyzdar arasyndaǵy 9 dúrkin, áıelder arasyndaǵy 4 márte chempıony atanǵan. Sol sııaqty álemniń qyzdar arasyndaǵy 9 ret chempıony. Áıelder arasyndaǵy 2013 jylǵy álem chempıony, 2007, 2011 jyldardaǵy kúmis júldegeri, Eýropanyń 2014 jylǵy chempıony. Álemniń MARSh nusqasy boıynsha 2007 jylǵy qola júldegeri, Jasóspirimder arasyndaǵy birinshi Búkilálemdik olımpıadanyń jeńimpazy (2006), Ekinshi Búkilálemdik ıntellektýaldar oıyndarynyń qola júldegeri (2012), Birinshi Álem lıgasynyń kúmis júldegeri (2011).
Dańqty qandasymyzdy ákesi Sábıt Sarshaev jattyqtyrady, dep habarlaıdy egemen.kz.
