Qazaq qyzy Qytaı telehıkaıasyna tústi

Bir jarym mıllıard qytaıdyń arasynan sýyrylyp shyǵyp, kınoǵa túsý ońaı emes! Jat jurtta dúnıege kelip, sol elde ǵumyr keship jatsa da, qazaqtyń atyn asqaqtatyp júrgen qarakózimiz áldeqashan ózin dáleldep úlgergen. Juldyzdaı jarqyraǵan jas talanttardy tanystyratyn ádettegi dástúrimiz boıynsha aktrısa Rıza Álimjanqyzy týrasynda oqyrmanǵa jetkizýdi jón kórdik, dep jazady «Nur Astana» basylymy..

 Qytaı astanasy Beıjiń qalasynda 1986 jyly jaryq dúnıe esigin ashqan Rıza bala kúninen ádemilikke qumartyp ósti. Oıyn balasy kezinde-aq anasynyń kóılekteri men biz óksheli aıaq kıimin kıip alyp, «men halyq ártisimin, qol soqpasańdar, shyqpaımyn» dep nazdanatyn. Sulýlyqqa jany qushtar qaǵylez qyzdy armany aldamapty. Nebári on bes jasynda 10-synyp oqýshysy ózin sándik qyrynan tanytyp, tanymal brendtiń jarnamasyna tústi. «Baǵyńdy synap kórseńshi» dep usynys aıtqan ádebıet pániniń ustazyna áli kúnge alǵysy sheksiz. Kamera ony erekshe súıetin. Osylaısha, onyń juldyzdy sáti bastaldy.

Alaıda, bolmysynan ataq-dańqqa qumartpaıtyn Rıza óz qatarlastarynan erte eseıse de, «juldyz aýrýyna» shaldyqpady. Alǵyr da talantty qyz joǵary bilim alýǵa umtyldy. Degenmen, básekesi kóp kıno salasynda bilim alamyn degen oı úsh uıyqtasa túsine de kirmepti. Instıtýtqa túsýiniń ózi qyzyq.

Bir joly ádettegideı jarnamaǵa túsýge anasymen birge bara jatqan sánqoı qyzdyń kózi úlken qaladaǵy kıno  ınstıtýtynyń ǵımaratyna túsedi. 18 mıllıonnan astam turǵyny bar alyp shahardyń qaı jerde ne baryn jattap júrý qıyn. Kóz aldynda turǵan keńse ártisterin tárbıeleıtin ortalyq ekenin anasynan sol joly ǵana estigen Rızanyń óner ordasynyń stýdenti bolýǵa esi ketti. Alǵa qoıǵan maqsatyna jetpeı tynbaıtyn qyzynyń qaısarlyǵyn biletin sheshesi de ony qaıraı túspek bolyp: «Qaptaǵan qytaıdyń ishinen saǵan bul jerde oryn joq. Túse almaısyń oqýǵa», degen-di. «Ózge ulttyń ókili bolǵanym úshin be? Endeshe, qaıtsem de túsemin» dep óz-ózine sert bergen Rızany alda talaı jarqyn belester kútip turǵan edi...

Kınokamera aldyndaǵy tusaýy 2010 jyly «Zaǵıptar teatrhanasy» fılminde kesildi. Fılmde zaǵıp qyz - Shıaý Oýdyń ishki kúızelisi men arpalysyn shynaıy kórsetken qazaq qyzynyń óz kórermeni qalyptasty. Basqa álemde kún keshken beıbaq zaǵıptiń jan daýysyn jetkizý ońaı emes-ti. «Ár rólime jańasha kózqaraspen, basqasha talǵammen jáne basqa adam retinde kelemin. Sebebi, ekran shynaıylyqty súıedi. Maǵan Shıaý Oýdyń rólin usynǵanda, eki kún boıy kózimdi baılap alyp, qarańǵy qalypta júrdim. Osylaısha, ózimdi synaqtan ótkizdim. Sebebi, keıipkerdi alyp shyǵa alam ba, joq pa degen kúdik basym edi», dep aǵynan jaryldy Rıza.

Shıaý Oýdy sátti somdaǵan soń, rejısserler de senim bildiretin boldy. Kezekti rólderge usynys ta birinen soń biri túsip jatty. «Qanat ushqan saıyn qataıady» degen ras eken. Sol jyly Rızaǵa «Karta ashamyn» atty kórkem týyndyda Tsýn Zýozýonyń róli buıyrdy. 2011 jyly «Jalǵandyqpen kúres» komedııasynda Jań Lın beınesinde de sátti kórindi.

Kıno áleminde Rızanyń baǵyn ashqan keıipkerdiń biri - «Jyn Shýan hıkaıasyndaǵy» Lan I edi. Dostarynyń qolqa salýymen telehıkaıaǵa túsýge kelisken Lan Idiń róli Rızanyń ońtaıyna keldi. Bir qyzyǵy, ekeýiniń taǵdyry uqsas. Túsirilim barysynda sáıgúliktiń qulaǵynda oınaýdy da úırendi. Bizdiń keıipkerimiz de aqyldy, zerek, qarapaıym ári óz súıgeni úshin bar ómirin arnaǵan Lan I sekildi mahabbaty úshin qurbandyqqa daıyn. Alǵashqy túsken serıaly bolǵandyqtan, boıy úırenise almaǵan tustary kóp bolǵanymen de qıyndyqtardy jeńip, úlken sabaq aldym deıdi.

Týmasynan jany da, táni de sulý taldyrmash boıjetken qaıbir jyly qytaılyq «Ruili Fashion Pioneer» sán jýrnaly ótkizgen memlekettik deńgeıdegi konkýrsta «Eń tartymdy ártis» atalymyn da ıelendi.