Qazaq qyzy ırandyqtarǵa Abaı shyǵarmalaryn nasıhattap júr
Tárjimashy qyz aqynnyń kitaptaryn jınap qana qoımaı, olardy orys, aǵylshyn jáne parsy tilderine aýdarýmen aınalysady. Onyń kitaphanasynda uly oıshyldyń ondaǵan týyndysy bar. Ol aı saıyn kitap kórmeleri men jármeńkeler uıymdastyryp, Taıaý Shyǵys halqyna elimizdiń ádebıeti men mádenıetin tanytyp júr.
Hakim Abaıdy ırandyqtar da áldeqashan moıyndaǵan. Gaýhar Omarhanovanyń aıtýynsha, aýdarmada eń qıyny – klassıktiń shyǵarmalarynyń maǵynasy ǵana emes, ádebı oramdaryn da ózgerissiz jetkizý.
Irandyq jastar Abaı Qunanbaevtyń shyǵarmalaryn Gaýhar sııaqty qandastarymyzdyń arqasynda tanyp, bilip keledi.
«Elimizdi uly aqyn Abaı Qunanbaevtyń shyǵarmalary arqyly tanystyryp jatqanymyzdy maqtan tutamyz. Maǵan onyń óleńderi men qara sózderi qatty unaıdy. Sondyqtan Iranda ár tilde jaryq kórgen aqynnyń barlyq shyǵarmalaryn jınap kelemin», - deıdi Gaýhar.
Gaýhardyń talpynysynyń arqasynda Tegerandaǵy kitap jármeńkeleriniń kóbi Abaı shyǵarmalarynsyz ótpeıdi. Jergilikti medıaholdıngtiń birinde jumys isteıtin jas qyz ırandyqtardy elimizdiń mádenıetimen telearna men radıo arqyly da tanystyryp turady.
«Kitaphanamda parsy tiline aýdarylǵan Abaı joly men qazaq tilindegi nusqasy bar. Budan bólek, aqynnyń parsy tili men aǵylshyn tiline aýdarylǵan óleńderi bar», - deıdi otandasymyz.
10 jyl ishinde Gaýhar qanshama ırandyqtyń Abaı týyndylaryna degen mahabbatyn oıatqanyn sanap jetkizý múmkin emes. Olardyń qatary júzdep sanalatyn shyǵar.
«Sebebi, uly aqynnyń óleńderi ár adamnyń júregine tez jol taýyp, baýrap alady», - deıdi aýdarmashy qyz.
