Qazaq qyzy Australian Open týrnıriniń sensatsııasy atandy
ASTANA. 17 qańtar. QazAqparat - «Úlken dýlyǵa» týrnıriniń úshinshi aınalymyna alǵash ret shyǵyp otyrǵan qazaqstandyq tennısshi Zarına Dııas Sports.ru portalynyń baǵalaýy boıynsha atalmysh dodanyń jańalyǵy dep tanyldy. Bul týraly Vesti.kz saıty habarlap otyr.
Basylymnyń jazýynsha, 20 jasar qazaq qyzy Melbýrnde tennısten ótip jatqan Aýstralııanyń Ashyq chempıonatynda sport álemi úshin úlken sensatsııaǵa aınaldy. Buryn Z.Dııas týrnırdiń biliktilik kezeńinen óte almaýshy edi. Al qazir ol 1/16 fınalǵa ótip otyr.
Eske sala keteıik, Australian Open dodasynyń biliktilik saıysynan sátti ótken Z.Dııas birinshi aınalymda chehııalyq Katerına Sınıakovany, ekinshi aınalymda Marına Erakovıchti jeńgen bolatyn.
Erteń, 18 qańtar kúni jerlesimiz álemniń 11-raketkasy 22 jasar rýmynııalyq sportshy Sımona Haleppen kezdesý ótkizedi.
