Qazaq qyzdarynyń sulýlyǵy shabyttandyrady - amerıkalyq sýretshi
ASTANA. QazAqparat - Amerıkanyń Tehas shtatynan kelgen Leın - «EKSPO-2017» kórmesin tamashalaýǵa arnaıy kelgenderdiń biri. Kórme aıasyndaǵy sharalardyń erekshe kózge túsken tustaryn ol qaǵaz betine sýret qylyp túsiredi.
Leınniń qoıyn dápterindegi sýretterdiń basym bóliginde qazaq halqynyń ulttyq oıyndary, ulttyq kıimdegi qazaq qyzdary, búrkit, at, túıe beınelengen.
«Munda ótip jatqan sharalardan alǵan áserim óte mol. Qazaq halqy qonaqjaı, kishipeıil halyq. Ár qazaqtyń júzinen jylylyq baıqaýǵa bolady. Ásirese qazaqtyń qyzdary óte sulý. Olardyń sýretin sala bergiń keledi, shyǵarmashylyq adamy úshin erekshe shabyt syılaıdy. Men tipti shashymdy naǵyz qazaq qyzdaryna eliktep qos burymdy etip órip aldym, - deıdi amerıkalyq sýretshi.
Elordanyń ár tusynda ótip jatqan mádenı merekelik sharalardyń ishinde Leınge erekshe unaǵany - Astananyń tórinde eki aptadan beri qazaqtyń salt-dástúri men ulttyq mádenıetiniń qaınaǵan ortasyna aınalǵan etnoaýyl.
«Bul jerdegi on saýsaǵynan bal tamǵan qolóner sheberleriniń týyndylary men qazaq halqynyń zergerlik buıymdary eriksiz nazar aýdartady. Ár halyq óziniń ulttyq bolmysymen ǵana erekshelenedi emes pe?! Mundaǵy qolónershilerdiń týyndylaryna qarap, halyqtyń estetıkalyq talǵamynyń joǵarylyǵyn ańǵarýǵa bolady», - deıdi Leın.
