Qazaq qyzdary Shvetsııada ótken boks týrnırinde 11 medal jeńip aldy
ASTANA. QazAqparat - Shvetsııanyń Býros qalasynda ótip jatqan Golden Girl týrnırinde Qazaqstannyń boksshy qyzdary 3 altyn, 2 kúmis jáne 6 qola medal jeńip aldy, dep habarlaıdy QazAqparat.
Qazaqstan Boks federatsııasynyń habarlaýynsha, Golden Girl týrnıriniń alǵashqy altynyn 80 kelige deıingi salmaq sanatynda jarys jolyna shyqqan 15 jastaǵy Eldana Tálipova qanjyǵaǵa saldy. Talantty jas boksshy aqtyq aıqasta ırlandııalyq Loren Raıannan basym tústi. Aıta keterligi, qazaq boksshysy birinshi raýndtyń 90-shy sekýndynda-aq tóreshiler sheshimimen jeńiske jetken bolatyn.
Jasóspirimder arasynda álem chempıony 16 jastaǵy Nadejda Rıabets (69 keli) te birneshe aýyr kezdesý ótkizip, sońǵy jekpe-jekte kanadalyq Charlı Kavanodan basym tústi. Úshinshi altyndy Almaty oblysynyń týmasy 16 jastaǵy Gúzalııa Sadyqova jeńip aldy. Eskere keterligi, 75 kelige deıingi salmaq sanatynda fınalǵa shyqqan boksshymyzdyń qarsylasy taǵy bir otandasymyz Saltanat Estaeva bolǵan edi.
Rıabets pen Sadyqova 2018 jyldyń qyrkúıeginde Býenos-Aıreste ótetin jasóspirimder arasyndaǵy Olımpıada oıyndaryna qatysýǵa úmitker sanalady.
Shvetsııanyń Býros qalasynda ótip jatqan Golden Girl týrnırine álemniń 22 elinen 254 sportshy qatysty.
