Qazaq qyzdar ýnıversıteti Anglııanyń bedeldi oqý oryndarymen yntymaqtastyq ornatty
ASTANA. QazAqparat - Qazaq memlekettik qyzdar pedagogıkalyq ýnıversıteti men Ulybrıtanııanyń birqatar jetekshi joǵary oqý oryndary bilim berý, ǵylymı jáne mádenı baılanystar boıynsha ózara yntymaqtastyq jónindegi memorandýmǵa qol qoıdy. Bul jaıynda atalǵan oqý ornynyń baspasóz ortalyǵynan málim etti, dep habarlaıdy QazAqparat tilshisi.
Atap aıtqanda, Qyzdar ýnıversıtetiniń rektory Gaýhar Aldambergenova men Anglııanyń WesternInternational Sollege dırektory, professor Kedrık D. Bell ózara kelisimge kelip, áriptestik baılanys ornatýǵa ýaǵdalasty.
Qujat kademııalyq utqyrlyq baǵdarlamasy aıasynda stýdentter, professor-oqytýshylar men ǵylymı qyzmetkerler almasý, birlesip ǵylymı-zertteý jobalaryn ázirlep, júzege asyrý, aǵylshyn tili kýrstaryn uıymdastyrý, qos dıplomdy bilim berý baǵdarlamasy aıasynda oqytý sharalaryn qarastyrady. Sondaı-aq, memorandýmda akademııalyq aqparattarmen, oqý-ádistemelik quraldarmen jáne materıaldarmen bólisý, ózara kelisimsharttar negizinde basqa da akademııalyq yntymaqtastyq sharalaryn ornatý kózdelgen.
Kezdesýde Qazaq memlekettik qyzdar pedagogıkalyq ýnıversıtetiniń rektory Gaýhar Aldambergenova pedagogıkalyq bilim ordasy týrasynda sóz qozǵap, taraptar ǵylymı-mádenı qarym-qatynastardy nyǵaıtýǵa baǵyttalǵan ózara tıimdi ekijaqty damytý máselelerin talqylady.
«Aldyna qazirgi ýaqyt talabyna tolyq jaýap bere alatyn pedagog kadrlardy daıarlaýdy maqsat etip qoıǵan Qazaq memlekettik qyzdar pedagogıkalyq ýnıversıteti óziniń qyzmetin Memleket basshysy Nursultan Nazarbaevtyń «2016-2019 jyldarǵa arnalǵan Qazaqstan Respýblıkasyndaǵy bilim men ǵylymdy damytý jónindegi» memlekettik baǵdarlamasy sheńberinde júrgizedi. Ýnıversıtettiń 6 fakýltetindegi 28 kafedra bakalavr boıynsha - 42, magıstratýra boıynsha - 23 jáne PhD doktorantýra boıynsha 4 mamandyq negizinde muǵalimder daıyndaıdy. Sonymen qatar, syrttaı oqý bóliminiń stýdentteri 20 mamandyq boıynsha qashyqtyqtan oqytý tehnologııasyn paıdalanyp, bilim alady. Búginde oqý ornynda jalpy sany 7 myńǵa jýyq stýdent, magıstranttarmen doktoranttar oqıdy. Olarǵa 55 ǵylym doktory, 230-dan astam ǵylym kandıdatymen 90-ǵa jýyq PhD doktoranty men ǵylym magıstri dáris beredi.
Ýnıversıtettiń 30 ustazy «Qazaqstan Respýblıkasynyń Joǵary oqý ornynyń úzdik oqytýshysy» memlekettik grantynyń ıegeri atandy. Ekinshi dúnıejúzilik soǵystyń qıyn-qystaý kezinde - 1944 jyly ashylǵan bul biregeı bilim uıasyn osy jyldar aralyǵynda myńdaǵan túlek bitirip shyqty. Qazirgi kúnde munda stýdentterdiń sapaly bilim alyp, ǵylymmen, ónermen, sportpen aınalysýy úshin, olardyń boıynda halqymyzdyń ulttyq qundylyqtaryn darytý oraıynda birqatar jumystar jasalyp, ýnıversıtet otandyq joǵary oqý oryndary arasynda úlken bedelge ıe bolyp otyrǵany kóńilge qýanysh uıalatady», - dep atap ótti Gaýhar Tóremuratqyzy.
Oqý orny rektorynyń aıtýynsha, qazirgi tańda Qyzdar ýnıversıteti álem elderiniń 30-ǵa jýyq joǵary oqý ornymen yntymaqtastyq ornatqan. Olardyń qatarynda AQSh, Úndistan, Frantsııa, Qytaı, Germanııa, Túrkııa, Malaızııa syndy memleketterdiń bedeldi ýnıversıtetteri bar.
Óz kezeginde Western International Sollege dırektory, professor Kedrık D. Bell eki eldiń joǵary oqý oryndary arasyndaǵy baılanystyń arta túsetindigine senim bildirip, yntymaqtastyqty damytýǵa nıetti ekendigin jetkizdi.
