Qazaq-qytaı shekarasyndaǵy Maıqapshaǵaı keden beketi 2024 jyly jańǵyrtylyp bitedi

ÓSKEMEN. QazAqparat – Qazaqstan men Qytaı shekarasynda ornalasqan «Maıqapshaǵaı» keden beketi kelesi jylǵa deıin qaıta jańǵyrtylady, dep habarlaıdy QazAqparat tilshisi.

ShQO ákimdiginiń málimetine súıensek, aımaq basshysy Ermek Kósherbaev Zaısan aýdanyna jumys sapary barysynda Qazaqstannyń Qytaı Halyq Respýblıkasymen shekarasynda ornalasqan «Maıqapshaǵaı» keden beketine barǵan.

Bul - avtomobıl jáne júk-jolaýshylar kóligin ótkizetin halyqaralyq beket.

«Búgingi kúni júrgizilip jatqan qaıta jańǵyrtý jumystary shekaraǵa deıingi alty jolaqty joldy, turaq oryndaryn qamtıtyn bolady. Munyń barlyǵy bekettiń keshendi túrde ótkizý qabiletin arttyrýǵa múmkindik beredi. QHR-men taýar aınalymy jyl saıyn artyp keledi. Bul beket Qytaı tarapyna aparatyn qaqpa. Kún saıyn keden arqyly júzdegen kólik ótedi jáne bul pandemııadan keıingi tamasha kórsetkish», - deıdi oblys ákimi.

Ermek Kósherbaev qurylysshylarmen kezdesti. Qazir munda 62 adam jumys isteýde.

Olar materıaldardy jetkizýde qıyndyqtar baryn aıtty.

Endi oblys ortalyǵynan emes, jaqyn mańdaǵy iri eldi mekenderden jetkizý máselesi qarastyrylady.