Qazaq-qytaı birlesken elektrondyq kommertsııa parki qurylmaq
ASTANA. QazAqparat - «Astana» halyqaralyq qarjy ortalyǵy (AHQO) men Hanchjoýdyń elektrondyq kommertsııa boıynsha ındýstrıaldyq parki nıettestik hatyna qol qoıdy. Oǵan sáıkes, AHQO aımaǵynda elektrondyq kommertsııa ındýstrııasyn damytý boıynsha birlesken park qurý múmkindigin zertteıtin bolady, dep habarlaıdy QazAqparat AHQO baspasóz qyzmetine silteme jasap.
Qazaqstan Respýblıkasy Úkimeti men Qytaı Halyq respýblıkasy arasyndaǵy «Nurly jol» jańa ekonomıkalyq saıasaty men «Jibek jolynyń ekonomıkalyq beldeýi» sekildi baǵdarlamalarda kórsetilgen mindetterdi birlesip júzege asyrý maqsatynda taraptar yntymaqtasa jumys isteýdi kózdep otyr. Bul degenimiz - Qazaqstandaǵy elektrondyq kommertsııa ındýstrııasyn alǵa jyljytý jáne damytý, elektrondyq kommertsııa salasyndaǵy qytaılyq kompanııalardy Ortalyq Azııa naryǵyna shyǵarý, AHQO-nyń negizgi baǵyttarynyń biri - qarjy tehnologııalaryn damytý.
Osy qujatqa saı, Hanchjoý elektrondyq kommertsııa boıynsha ındýstrıaldyq parki AHQO-men birge qazaqstandyq elektrondyq kommertsııa parkin qurý men paıdalaný boıynsha óziniń resýrstarymen jáne tehnıkalyq tájirbıesimen bólispek.
Taraptar, sonymen qatar, elektrondyq saýda salasyndaǵy zertteýler boıynsha aqparat almasýǵa, birlesken oqý, bilim berý baǵdarlamalary, onyń ishinde semınarlar, konferentsııalardy uıymdastyryp, ótkizýge kelisti.
AHQO men qytaılyq kompanııa arasyndaǵy yntymaqtastyq AHQO aımaǵynda elektrondyq kommertsııanyń Aımaqtyq habyn qurýda mańyzdy ról oınamaq.
AHQO-nyń maqsaty qarjylyq qyzmetterdi kórsetetin halyqaralyq deńgeıdegi jetekshi ortalyq qalyptastyrý. Postkeńestik keńistikte tuńǵysh ret aǵylshyn quqyǵynyń qaǵıdattary engiziledi, qarjy ortalyǵynyń resmı tili - aǵylshyn tili bolady.
«Astana» halyqaralyq qarjy ortalyǵy mindetteri qarjylyq qyzmetter salasynda ınvestıtsııalaý úshin tartymdy orta qurý arqyly el ekonomıkasyna ınvestıtsııalar tartýǵa járdemdesý, Qazaqstan Respýblıkasynyń baǵaly qaǵazdar naryǵyn damytý, onyń halyqaralyq kapıtal naryqtarymen yqpaldasýyn qamtamasyz etý bolyp tabylady. AHQO sondaı-aq elimizde saqtandyrý, bank qyzmetteri men ıslamdyq qarjylandyrý naryǵyn damytýǵa nıettenedi.
