Qazaq-qyrǵyz shekarasyndaǵy jaıt: Elshilik qyzmetkeri tutqynǵa alynǵan joq
NUR-SULTAN. QazAqparat - Qazaqstannyń Qyrǵyzstandaǵy Elshiligi qyzmetkeriniń qatysýymen bolǵan keleńsiz jaıtqa baılanysty qyzmettik tekseris júrip jatyr. Bul týraly búgin ótken brıfıngte QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«2020 jyldyń 10 qańtarynda memlekettik shekaranyń «Aq jol» - «Qordaı» baqylaý-ótkizý pýnktindegi Qyrǵyzstan jaǵynda Qazaqstannyń Qyrǵyzstandaǵy Elshiliginiń ákimshilik-tehnıkalyq personaly qyzmetkeriniń qatysýymen oqıǵa oryn aldy. Qazirgi ýaqytta qyzmettik tekserý júrip jatyr. Onyń nátıjesinde tıisti shara qabyldanatyn bolady«, - dedi Aıbek Smadııarov,
Onyń aıtýynsha, Qazaqstan Elshiligi qyzmetkeriniń kóliginde otyrǵan áıel elimizdiń syrtqy dıplomatııalyq korpýsynyń qyzmetkeri emes. Ol dıplomatııalyq nómiri bar Elshilik qyzmetkeri basqaryp kele jatqan kólikte otyrǵan.
«Elshilikke onyń esh qatysy joq. Qazir onyń dıplomatııalyq kólikte nelikten otyrǵandyǵy anyqtalyp jatyr. Nátıjesin qosymsha jarııa etemiz. Ol Qyrǵyzstan aýmaǵyndaǵy bir is boıynsha kúdikti. Oǵan sol elden shyǵýǵa shekteý qoıylǵan», - dedi resmı ókil.
Aıbek Smadııarov Elshilik qyzmetkeri tutqynǵa alynbaǵandyǵyn basa aıtty.
«Ol – Bishkekte. Keıbir BAQ habarlaǵandaı, ol tutqynǵa alynǵan joq. Tek kóligin shekarany kesip ótý barysynda tekserý úshin toqtatqan. Áıel de Bishkekte, óz úıinde. Ol sol jaqta turady», - dedi ol.
Aıta keteıik, buǵan deıin QR SІM qyrǵyz tarapymen birlesip, oqıǵanyń mán-jaıyn anyqtap jatqanyn habarlaǵan bolatyn.
