Qazaq-qyrǵyz shekarasyndaǵy Qordaı áskerı jasaǵy jańa qalashyqqa kóshti
Qyrǵyz Respýblıkasymen memlekettik shekarany kúzetetin Qordaı shekara jasaǵy búgin qonys toıyn toılap jatyr. Saltanatty sharaǵa QR Ulttyq qaýipsizdik komıteti jáne Shekara qyzmetiniń basshylyǵy, sondaı-aq attas eldimeken men Jambyl oblysy ákimdiginiń ókilderi qatysty. Shara barysynda Qordaı shekara jasaǵynyń basshysyna ózine senip tapsyrylǵan qurylymnyń sımvoldyq kilti tabys etildi.
«El Prezıdenti - Qazaqstan Respýblıkasy Qarýly Kúshteriniń Joǵarǵy Bas Qolbasshysy Nursultan Ábishuly Nazarbaevtyń tapsyrmasyn oryndaý úshin Shekara qyzmetiniń jaýyngerlik qyzmetiniń tıimdiligin arttyrý boıynsha úlken keshendi sharalar ótkizilýde. Jańa bólimshelerdiń turǵyn úı keshenderi salynyp, sońǵy úlgidegi qarý-jaraqtar men tehnıkalar satyp alynyp jatyr. Strategııalyq baǵyttardyń birinde shekara kúzetý isimen aınalysyp kele jatqan Qordaı shekara jasaǵynyń áskerı qalashyǵyn ashý - sonyń jarqyn dáleli bola alady», - dep atap ótti QR Ulttyq qaýipsizdik komıtetiniń tóraǵasy Kárim Másimov saltanatty shara barysynda.
Qazaqstan Respýblıkasy Ulttyq qaýipsizdik komıteti Shekara qyzmetinen málim etkendeı, qurylysy úsh jylǵa sozylǵan Qordaı shekara jasaǵynyń jańa áskerı qalashyǵynda 40-qa jýyq qyzmettik ǵımarat bar. Atap aıtqanda, ashanalar, kazarmalar, qoımalar, kıno kórýge arnalǵan 350 oryndyq úlken akt zaly, shekara otrıadynyń Jaýyngerlik Dańq murajaıy, kitaphana, psıhologııalyq jeńildeý bólmeleri, sondaı-aq túrli jarystar men úıirmeler ótkizýge arnalǵan jeke sporttyq keshen áskerılerdiń ıgiline berildi.
QR Ulttyq qaýipsizdik komıteti Shekara qyzmetiniń baspasóz qyzmetinen habarlaǵandaı, Jambyl oblysyndaǵy Qordaı shekara jasaǵynyń jańa áskerı qalashyǵynda shekarashylardyń áleýmettik jaǵdaıyna, el shebinde adal qyzmet atqarýyna barlyq jaǵdaı jasalǵan.
