Qazaq-qyrǵyz shekarasynda azyq-túlik ónimderin jasyryn alyp ótpek bolǵan azamat ustaldy

ASTANA. QazAqparat - Shekara qyzmetiniń «Ońtústik» óńirlik basqarmasy «Taraz» shekara otrıadyna qarasty «Sypataı batyr» baqylaý-ótkizý beketiniń baqylaýshylary 49 jastaǵy Qyrǵyzstan azamatyn ustady. Ol «VOLVO» kóliginiń qupııa jerine azyq-túlik ónimderin jasyryp, memlekettik shekaradan óziniń eline zańsyz alyp ótýge tyrysqan.

«Kúdiktiniń avtokóligin tekserip qaraǵan kezde, shanaǵynyń qupııa jerine jasyrylǵan azyq-túlik ónimderi - 12 qap un men 30 shólmek kúnbaǵys maıy (150 lıtr) tabyldy», delingen QR UQK Shekara qyzmeti baspasóz qyzmetiniń habarlamasynda.

Atalǵan azamatqa Qazaqstan Respýblıkasy Ákimshilik-quqyqtyq kodeksiniń 427-baby boıynsha (Kedendik odaqtyń memlekettik shekarasy arqyly ótetin taýardy kedendik jáne shekaralyq baqylaýdan jasyrý) aıyp taǵyldy.

Tergeý amaldary júrgizilýde.