Qazaq-qyrǵyz shekarasynda avtokólik keptelisi paıda boldy

BІShKEK. «Kabar» – 16 jeltoqsan saǵat 15:30-daǵy jaǵdaı boıynsha Qyrǵyzstannan Qazaqstanǵa shyǵatyn «Chon-Kapka-Avtodorojnyı» ótkizý beketinde avtokólik keptelisi paıda bolǵan. Bul týraly QazAqparat Qyrǵyzstannyń UQMK shekara qyzmeti men Kabar agenttigine silteme jasap habarlaıdy.

Qyrǵyzstannan shyǵýǵa kezekte 25-ke jýyq jeńil jáne 20 júk kóligi tur.

Sondaı-aq, «Aq-tilek – Avtodorojnyı» ótkizý beketiniń aldynda da uzyn-sonar kezek tirkelgen.

Shekara baqylaýynan ótý úshin 97-ge jýyq júk kóligi kezekte tur.

«Mashınalardyń jınalýy janar-jaǵarmaı materıaldaryn tasymaldaýmen aınalysatyn jeńil mashına sanynyń artýymen baılanysty. Sonymen qatar, keıbir júk jáne jeńil avtomobıl júrgizýshileri kezek saqtamaı, kezekten tys júrýge tyrysyp, osylaısha baqylaý-ótkizý beketine kirer aldynda keptelis týǵyzdy», - deıdi qyrǵyzstandyq vedomstvo.

Bul baǵytta Qyrǵyzstannyń shekara qyzmeti tıisti jumys júrgizip jatyr. Olar kólik quraldarynyń jınalýy tsıkldik sıpatta bolatynyn aıtýda.

«Bul rette Qyrǵyz Respýblıkasy UQMK Shekara qyzmeti tarapynan shekaralyq baqylaýdan ótý kezinde júk tasymaldaýshylar men júrgizýshiler úshin shekteýler joq ekenin atap ótemiz. Qyrǵyzstan-Qazaqstan ýchaskesindegi basqa ótkizý pýnktterinde adamdar men avtokólik quraldarynyń jınalýy tirkelgen joq», - dep tolyqtyrdy Qyrǵyzstan memlekettik shekarasy.

Bul másele boıynsha QazAqparat agenttigi Qazaqstan Respýblıkasynyń Ulttyq qaýipsizdik komıtetiniń baspasóz qyzmetine júgindi. Olardyń habarlaýynsha, keptelis shekaranyń Qyrǵyzstandaǵy bóliginde qalyptasqan, Qazaqstan tarapynda jaǵdaı turaqty.