Qazaq-qyrǵyz shekarasynda árbir júk kóliginde málimdelmegen taýarlar anyqtaldy

NUR-SULTAN. QazAqparat – Eýrazııalyq ekonomıkalyq komıssııa mınıstri qazaq-qyrǵyz shekarasyndaǵy jaǵdaımen tanysty, dep habarlaıdy QazAqparat QR Qarjy mınıstrliginiń Memlekettik kirister komıtetine silteme jasap.

Bıyl 3 maýsymda Jambyl oblysy Qordaı aýylynda Qazaqstan Respýblıkasy Qarjy mınıstrligi Memlekettik kirister komıtetiniń ókilderi Kedendik yntymaqtastyq jónindegi alqa múshesi (Mınıstr) M.S. Mamytkanov bastaǵan Eýrazııalyq ekonomıkalyq komıssııanyń ókilderimen, sondaı-aq Qyrǵyz Respýblıkasy men Reseı Federatsııasynyń fıskaldyq organdarynyń ókilderimen qazaq-qyrǵyz shekarasyndaǵy jaǵdaı boıynsha kezdesý ótkizdi.

Kezdesý barysynda qazaqstandyq tarap tikeleı «Qordaı» jáne «Qarasý» avtomobıl ótkizý pýnktterinde qatysýshylardy taýarlardy ótkizý monıtorıngi boıynsha bıznes-protsestermen tanystyrdy, qoldanylatyn aqparattyq júıelerdiń, sondaı-aq ınspektsııalyq-tekserý keshenderi arqyly baqylaýdyń jumys prıntsıpin kórsetti.

Kezdesýge qatysýshylar shekaranyń qazaqstandyq ýchaskesinde bir júk avtokólik quralynyń ótý ýaqyty orta eseppen 20 mınýttan aspaıtynyn jáne avtokólik quraldary jınalyp qalý jaǵdaılary bolmaıtynyn atap ótti.

Sondaı-aq, qazaqstandyq tarap Qazaqstan Respýblıkasynyń aýmaǵynda taqyryptyq salyqtyq tekserýler júrgizý protsesin kórneki túrde kórsetti, onyń barysynda is júzinde árbir júk avtokólik quralynda málimdelmegen taýarlar, onyń ishinde brendtik taýarlar anyqtaldy.

Óz kezeginde, kezdesýge qatysýshylar tekserýlerdiń Qazaqstan Respýblıkasynyń salyq zańnamasyn qatań saqtalyp júrgiziletinine kóz jetkizdi.

Jumys kezdesýiniń otyrysy barysynda Qazaqstan tarapy júrgizilip jatqan baqylaý sharalaryn, buzýshylyq faktileri jáne Qyrǵyz Respýblıkasymen qol jetkizilgen ýaǵdalastyqtardyń oryndalýy boıynsha sharalaryn tanystyrdy.

Kezdesý qorytyndysymen taraptar kezdesýge qatysýshylardyń jemisti jumysyn atap ótip, odan ári yntymaqtastyqtyń órkendeýine úmit bildirdi.