Qazaq-qyrǵyz dıplomatııalyq qatynastarynyń tarıhy kitaby jaryqqa shyǵady
Bul týraly Bishkekte Qazaq-qyrǵyz zııalylarynyń IV forýmynda QR UǴA akademıgi, tarıh ǵylymdarynyń doktory, professor Bolat Kómekov málim etti, dep habarlaıdy QazAqparat tilshisi.
«Adam balasyna úlken ıdeıany aıtatyn zııaly qaýym, ǵalymdar. Sol sebepti ózin ózi qurmetteıtin memleketterdiń óz ǵalymdaryna úlken qurmetpen qaraýy da zańdylyq. Qazaq pen qyrǵyz halyqtarynyń boıyna sińgen úlken qundylyqtar bar. Ol – Uly Dala órkenıetiniń qundylyqtary. Eki halyq ǵasyrlar boıy tumsa tabıǵatpen úndesip, úılesip ǵumyr keshti. Qorshaǵan ortany kóziniń qarashyǵyndaı saqtady. Qazaq pen qyrǵyz da birligin odan ári bekemdeı túsýi tıis. Eki el ǵalymdary zerttep kele jatqan jáne bolashaqta zertteýdi jalǵastyratyn ortaq taqyryp – dala órkenıeti. Dala órkenıetiniń ishinde qala da, memleket te, jazý da, mádenıet te bar»,– dedi Bolat Kómekov.
Óz kezeginde tarıh ǵylymdarynyń doktory, professor Zaınıdın Kýrmanov qazaq pen qyrǵyz halyqtary týysqandyǵyn joǵary qundylyq retinde baǵalaýy kerek ekenin atap ótti.
«Biz baýyrlas kórshi elder retinde bir-birimizge únemi nazar aýdaryp otyrýymyz kerek. Atap aıtqanda, Halyqaralyq Túrki akademııasy aıasynda tıisti usynystardy jasadyq. Bul turǵyda túrki respýblıkalary men halyqtary arasyndaǵy syrtqy saıası, dıplomatııalyq baılanystar zerttelgen oqýlyqtar nemese monografııa jazǵan durys bolatyndyǵy aıtyldy. ıAǵnı ejelgi kezeńnen qazirgi ýaqytqa deıingi aralyqty qamtyǵan jón», - dedi Z. Kýrmanov.
Osy oraıda ol Sh. Ýálıhanov atyndaǵy Tarıh jáne etnologııa ınstıtýtynyń dırektory Zııabek Qabyldınovpen qazaq-qyrǵyz dıplomatııalyq qatynastarynyń tarıhyna arnalǵan zertteýdi qamtıtyn kitapty jazýǵa ýaǵdalasqanyn jetkizdi.
«Biz baýyrlas el bolǵannan keıin tarıhtarymyzdy óte jaqsy bilemiz dep oılaımyz, alaıda biz bilmeıtin mańyzdy derekter barshylyq. Osy jaıynda tereńirek zerttesek, bizdiń dostyǵymyz ben yntymaqtastyǵymyz nyǵaıa túsedi degen oıdamyn», - dedi Zaınıdın Kýrmanov.
Osy oraıda Halyqaralyq Túrki Akademııasynyń prezıdenti Darhan Qydyráli dılomatııalyq qatynastar týraly zertteýler júrgizý usynysy talqylanǵanyn eske saldy.
«Sizder ortaq joba retinde júrgizseńizder, biz kitap retinde shyǵaryp berýge daıynbyz. Bul eki eldiń arasyndaǵy naqty joba bolar edi. Kitaptar dıplomatııalyq akademııalarda oqytylsa, quba-qup bolady dep oılaımyz», - dedi D. Qydyráli eki eldiń ǵalymdaryna qarata aıtqan sózinde.
Búgingi forým QR Prezıdenti Qasym-Jomart Toqaevtyń Qyrǵyz eline memlekettik sapary qarsańynda ótip jatyr.
