Qazaq kúılerin toptastyrǵan www.kui.kz saıty ashyldy
ASTANA. 28 aqpan. QazAqparat - Ǵalamtorda www.kui.kz saıty ashyldy. Onda qazaqtyń belgili kúıshileriniń kúıleri engen.
Saıttyń negizgi maqsaty - halqymyzdyń baǵa jetpes qazynasy, ata-baba murasy - kúıdi nasıhattaý. «Naǵyz qazaq qazaq emes, naǵyz qazaq - dombyra», - dep aqyn Qadyr Myrza Áli aıtqandaı, qasıetti qara dombyranyń shanaǵynan tógilgen kúıdiń sıqyrly kúmbir úninde qazaqtyń búkil bolmysy jatyr. Osy baǵa jetpes qazynamyz - kúıdiń nasıhattaýshysy áli de bolsa tapshy dep oılaımyn. Búgingi tańda ár adam óz úıinde otyryp-aq ǵalamtordan bárin tabady. Degenmen osy ǵalamtordy sharlaǵan adamdar qazaqtyń nebir qudiretti kúıin taba bermeýi múmkin. Halyqqa tanylǵan sazgerlerdiń kúıleri jeke-jeke berilip júr. Osy turǵydan alǵanda kúı saıtynyń ashylýy ıgilikti is bolyp otyr. Halyq Qurmanǵazy, Seıtek, Dáýletkereı, Dına, Mámen, Táttimbet, Qazanǵap, Abyl, Álshekeı jáne basqa kúı alyptarynyń shyǵarmalaryn ǵalamtor arqyly tyńdap, sýsyndaı alady.
Saıtta elimizdiń tanymal dáýlesker kúıshileri men talantty jas kúıshileri meıirińizdi qandyryp, qazaqtyń kúmbirlegen kúılerin tartyp qana qoımaıdy, sondaı-aq osynda ornalastyrylǵan «Kúı darııa» habarynda kúı ańyzdary men tarıhyna tereń toqtalady. Buryn kúı súıer qaýym radıolardan az tyńdap, teledıdardan sırek kóretin kúıshilerin endi ınternet arqyly qalaǵan ýaqytynda tyńdaı alady. Jańadan ashylǵan www.kui.kz saıtynyń materıaldary - mýzyka mamandaryna, muǵalimderge, stýdentter men oqýshylarǵa taptyrmas kómekshi qural. Saıtty qurýshylar onda ornalastyrylǵan kúılerdi óz otandastarymyzben qatar shet elderde turatyn qandastarymyzdyń tarapynan da jyly qabyldanatyndyǵyna senimdi.
