Qazaq kúılerin orkestrge laıyqtaǵan dırıjer Aldabergen Myrzabekov qaıtys boldy
ASTANA. QazAqparat - Qazaqstannyń halyq ártisi, dırıjer, qazaq kúılerin orkestrge laıyqtaǵan Aldabergen Myrzabekov ómirden ozdy.
Bul týraly agenttik tilshisine telefon arqyly bergen suhbatynda N.Tilendıev atyndaǵy «Otyrar sazy» akademııalyq folklorlyq-etnografııalyq orkestriniń dırıjeri Músilim Ámze málim etti.
«Qazaqstannyń halyq ártisi, professor, dırıjer Aldabergen Myrzabekov 88 jasqa qaraǵan shaǵynda dúnıeden ótti. Qazaq kúı ónerin orkestrge túsirýdiń shynaıy sheberi, kúı tabıǵatyn dóp tanyǵan asa bilgir dırıjer edi. Qazaq orkestrinde «Alshaǵyr», «Topan», «Jiger», «Qońyrqaz», «Yńǵaıtók», «Jezkıik», «Aman bol, sheshem» sııaqty kóptegen kúılerdiń baǵyn ashqan sýretker aǵamyzben tutas bir dáýirdiń paraǵy sýsydy. Keńes zamanynda jurttyń barlyǵy batys mýzykasyna den qoıǵanda, kúılerdi onyń ishinde shertpe kúılerdi tamasha etip orkestrge laıyqtaǵan tulǵa edi. Óte eńbekqor adam bolatyn. Qazirgi orkestrlerdiń repertýaryndaǵy kúılerdiń deni Myrzabekov laıyqtaǵan úsh partıtýra jınaǵy negizinde oınalady» - dedi Músilim Ámze.
Aıta keterligi, belgili dırıjer Aldabergen Myrzabekovpen qoshtasý rásimi 8 qańtarda, beısenbi kúni saǵat 10-da Almaty qalasynda Jambyl atyndaǵy qazaq memlekettik fılarmonııasynda ótkiziledi.
Aldabergen Qaıyrbekuly 1930 jyly 14 qarashada Qaraǵandy oblysy Jańaarqa aýdany Túgisken aýylynda dúnıege kelgen. Dırıjer, pedagog, QR halyq ártisi (1984 jyl), pýblıtsıst.
Almaty memlekettik konservatorııasynyń halyq aspaptar fakýltetin bitirgen (1955 jyl).
1956 jyly Qurmanǵazy atyndaǵy Qazaqtyń Memlekettik halyq aspaptar orkestrine dırıjerlik qyzmetke taǵaıyndalyp, 1968 - 1971 jyly orkestrdiń bas dırıjeri ári kórkemdik jetekshisi bolǵan. Sondaı-aq, 1971 - 1988 jyldar aralyǵynda dırıjer bolyp eńbek etti.
1962 jyly Mońǵolııanyń Baıan-Ólgeı aımaǵynda qazaq mýzykalyq drama teatrynyń kórkemdik jetekshisi jáne bas dırıjeri mindetin atqaryp, qazaq ult aspaptar orkestrin ashýǵa, ujymnyń oryndaýshylyq, kásibı deńgeıin kóterýge de atsalysqan.
Onyń orkestrge arnap túsirgen Táttimbettiń, Súgirdiń, Áshimtaıdyń shertpe kúıleri, Yqylastyń qobyz kúıleri, taǵy basqa halyq kompozıtorlarynyń án-kúıleri, orys jáne shet el klassıkteriniń týyndylary bar.
Mońǵolııanyń Baıan Ólgeı aımaǵynda qazaq mýzykalyq drama teatrynda qoıylǵan «Tulbanor shaıqasy» spektakline mýzyka jazdy.
Mádenıet qaıratkeriniń óziniń de án, kúıleri, kúrdeli ývertıýra, poema janrynda jazylǵan tól týyndylary kóptep sanalady. Myrzabekovtiń «Qońyrqaz», «Kókeıkesti», «Jiger» sııaqty orkestrge arnalǵan partıtýra, tańdamaly jınaqtary jaryq kórgen.
