Qazaq kúıi álemdik mýzykalyq platformalarda kúmbirleıdi
ASTANA. KAZINFORM — Qurmanǵazy atyndaǵy Qazaq ulttyq halyq aspaptar orkestriniń repertýaryndaǵy týyndylar álemniń jetekshi mýzykalyq platformalarynda jarııalandy, dep habarlaıdy Mádenıet jáne aqparat mınıstrliginiń baspasóz qyzmeti.
Orkestr tarıhynda alǵash ret qazaq kúıleri halyqaralyq mýzykalyq platformalarǵa shyǵarylyp, halqymyzdyń ǵasyrlar qoınaýynan jetken kúı ónerin jahan jurtshylyǵyna tanyta tústi.
Tsıfrlyq formatta qazaqtyń kórnekti kompozıtorlary men kúıshi ónerpazdarynyń shyǵarmalary usynyldy.
— Olardyń qatarynda Qurmanǵazy Saǵyrbaıulynyń, Dına Nurpeıisovanyń, Táttimbettiń, Qazanǵaptyń, Nurǵısa Tilendıevtiń jáne ózge de avtorlardyń kúıleri bar. Sonymen qatar kópshilik A.Jubanovtyń, E.Brýsılovskııdiń, K.Kúmisbekovtiń, T.Qajyǵalıevtiń, H.Tastanovtyń, S.Báıterekovtiń, S.Shabelskııdiń, L.Shargorodskııdiń jáne S.Qusaıynovtyń shyǵarmalaryn da tyńdaı alady, — delingen habarlamada.
Mýzykalyq týyndylar Spotify, Apple Music, YouTube Music, Amazon Music, ıAndeks Mýzyka jáne basqa da tanymal tsıfrlyq platformalarynda usynylǵan.
Osydan buryn kúıshi, kompozıtor Aıbek Bekbosyn kúı mádenıeti men búgingi tyńdarman talǵamy týraly áńgimeledi.
