Qazaq kúresinen Delı tórinde álem birinshiligi bastaldy
ASTANA. KAZINFORM – Keshe, ıaǵnı 26 aqpan kúni Úndistannyń Delı qalasynda qazaq kúresinen eresekter arasynda álem chempıonaty jalaýyn kóterdi. Eki kúnge jalǵasatyn dúbirli dodaǵa álemniń 20-dan astam eliniń 200-ge jýyq balýany qatysyp jatyr.
Atalǵan birinshiliktiń baǵdarlamasyna sáıkes, sportshylar (erler men áıelder) 16 salmaq dárejesinde kil myqtyny anyqtaýda. Delı tórinde tól kúresimizden el namysyn qorǵap jatqan balýandar qatarynda Bekjan Tólepov, Jumajan Qojambekov, Muzapparov Ersultan, Nurdáýlet Jarylǵapov, Zarına Sarıpova, Raýza Nurmahammetova jáne Roza Nysantaıqyzy syndy úzdikter bar.
Álem birinshiligi «Samuryq-Qazyna» ulttyq ál-aýqat qory» aktsıonerlik qoǵamy jáne Sport Qory sportty qoldaý qorynyń qoldaýymen delı qalasyndaǵy «Tıagaradj» ulttyq stadıonynda ótip jatyr.
Dúbirli dodanyń saltanatty ashylý sharasyna Úndistannyń Qazaq kúresi assotsıatsııasynyń prezıdenti Harısh Tıagı, erkin kúresten London — 2012 olımpıadasynyń qola júldegeri Iogeshvar Dýtt jáne UWW tehnıkalyq delegaty Onýr Shımshek qatysty.
Óz kezeginde sóz alǵan Qazaq Kuresi Assotsıatsııasynyń bas dırektory Damır Bekbosynov ulttyq qundylyǵymyz sanalatyn qazaq kúresin halyqaralyq arenada nasıhattaıtyn bul chempıonattyń mańyzdylyǵyn tilge tıek etti.
— Úndistan — qazaq kúresin belsendi túrde damytyp jatqan elderdiń biri. Qazirgi ýaqytqa deıin bul elde qazaq kúresinen tórt ret el chempıonaty ótken. Sizderdiń kúresimizge joǵary qyzyǵýshylyq tanytyp júrgenderińiz — biz úshin úlken maqtanysh. Ekijyldyqtyń basty dodasynyń aqtyq beldesýinde kúresetin balýandarǵa sáttilik, al kórermenderge jarqyn emotsııa tileımin, - dedi Damır Ásenǵazyuly.
Sporttyq shara barysynda UWW tehnıkalyq delegaty Onýr Shımshek Qazaq Kuresi Assotsıatsııasynyń bas dırektory Damır Bekbosynovtyń UWW ulttyq kúres túrleri komıteti atqarýshy keńesiniń músheligine qabyldanǵanyn jarııalady.
Aıta ketsek, álemniń 40-tan astam elinde qazaq kúresiniń federatsııalary jumys isteıdi. Búginge deıin qazaq kúresinen 10 álem chempıonaty, 12 Azııa chempıonaty, 6 álem kýbogy jáne 6 Eýropa chempıonaty ótti. Al, 2023 jyly qazaq kúresi Er-Rııad qalasynda ótken Dúnıejúzilik jekpe-jek oıyndarynyń baǵdarlamasyna tuńǵysh ret endi.
2024 jylǵy V DKO aıasyndaǵy qazaq kúresiniń jarysyna 46 memlekettiń 300-den astam sportshy qatysqan bolatyn. Sóıtip, qazaq kúresi keshendi oıyndardaǵy eń kóp sportshy qatysqan sport túri bolyp tanyldy. Sheteldik sportshylar bul dodada joǵary básekelestik kórsetip, túrli deńgeıdegi 48 medaldi jeńip aldy.
Álemniń 20-ǵa jýyq memleketiniń sportshylary qatysyp jatqan básekeniń birinshi jarys kúni tartysty ótti. Qatysýshy komandalar úlken daıyndyqpen kelgeni anyq baıqaldy. Ásirese, Úndistan eliniń qurama komandasynyń ókilderi qazaqstandyq balýandarǵa joǵary básekelestik tanyta bilgenin atap ótken jón.
Birinshi jarys kúniniń nátıjesi:
Erler. 55 kg
І oryn — Bekzhan TOLEPOV KAZ
ІІ oryn — Khurshidbek CHORIEV UZB
ІІІ oryn — Bablu KUMAR IND
60 kg
І oryn — Meiirzhan BEREKETOV KAZ
ІІ oryn — Giorgi INASHVILI GEO
ІІІ oryn — Eyvaz BAKHSHIYEV AZE
66 kg
І oryn — Nur AMANSHUKIROV KAZ
ІІ oryn — Gigi OTIASHVILI GEO
ІІІ oryn — Arkadiusz Jakub MAKAREWICZ POL
ІІІ oryn — Hemat KUMAR IND
74 kg
І oryn — Zhumazhan KOZHAMBEKOV KAZ
ІІ oryn — Navruz KARIMZOD TJK
ІІІ oryn — Hajali GASIMOV AZE
ІІІ oryn — Matheas TRILLJAERV EST
Áıelder. 48 kg
І oryn — Aizhan ZHYLKYBAYEVA KAZ
ІІ oryn — Oliwia Wiktoria KOZUCH POL
ІІІ oryn — Priya PRIYA IND
52 kg
І oryn — Sitora ELMURODOVA UZB
ІІ oryn — Muskan MUSKAN IND
ІІІ oryn — Aruzhan ADASKHAN KAZ
56 kg
І oryn — Rauza NURMAKHAMETOVA KAZ
ІІ oryn — Nisha KUMARI IND
ІІІ oryn — Martyna GALEK POL
60 kg
І oryn — Annu ANNU IND
ІІ oryn — Khurshida TUKHLIEVA UZB
ІІІ oryn — Gulim YELUBAY KAZ
ІІІ oryn — Fidan HUSEYNOVA AZE
Aıta keteıik, álem chempıonatynyń ekinshi jarys kúni, ıaǵnı búgin erler -82 kg, -90 kg, -100 kg, +100 kg, al áıelder -65 kg, -70 kg, -77 kg, +77 kg salmaq dárejesinde synǵa túsedi.
Eske sala ketsek, buǵan deıin qazaqstandyq erkin kúres sheberleri Albanııadaǵy týrnırde 3 medal jeńip alǵanyn habarlaǵan edik.