Qazaq kúresinen álem chempıonatynda áskerı qyzmetshileri 4 altyn medal jeńip aldy
ASTANA. KAZINFORM – Erler men áıelder arasynda tórt salmaq dárejesinde qazaq kúresinen CISM І-shi álem chempıonatynyń jeńimpazdary men júldegerlerin saltanatty marapattaý rásimi ótti.
Marapattaý rásimine Qazaqstan Ulttyq Olımpıada komıtetiniń prezıdenti Gennadıı Golovkın, «Qarýly kúshterdiń ardagerleri» RQB Ortalyq keńesiniń tóraǵasy Halyq qaharmany, armııa generaly Muhtar Altynbaev, CISM prezıdenti, Brazılııa armııasynyń polkovnıgi Rolım Fılo Nılton Gomes, CISM shtab-páteriniń resmı ókili, ırandyq polkovnık Reza Bakarı jáne sambodan Qazaq KSR eńbek sińirgen jattyqtyrýshysy, sport ardageri Dıhanbaı Bıtkózov qatysty.
Qazaqstan jeńilatletıkalyq kesheninde ótip jatqan qazaq kúresinen álem chempıonatynyń alǵashqy jarys kúninde erler men áıelder arasynda tórt salmaqta jeńimpazdar men júldegerler anyqtaldy.
Erler arasynda qazaq balýandary Bekjan Tólepov (55 keli), Saǵyndyq Áshim (66 keli), reseılik balýandar Gleb Golov (82 keli) jáne Vladımır Dosıak (100 keli) chempıon atandy.
Tartysty kúrestiń kúmis júldelerin Kımal Obolbekov (Qyrǵyzstan, 55 keli), Artem Shtýrbabın (Ózbekstan, 66 keli), Nurdáýlet Baqtybaıuly (Qazaqstan, 82 keli) jáne Jahongır Mamatrahımov (Ózbekstan, 100 keli) oljalady.
Qola medal 55 keli salmaq dárejesinde balýandar Hýrshıdbek Chorıev (Ózbekstan) pen Rııahı Abolfazylǵa (Iran), 66 keli salmaqta Poladı Hasan (Qytaı) men Saınım Talafqa (Iran), 82 keli salmaqta Ahmadzade Mersad pen Vıacheslav Plamadealýǵa (Moldova), 100 keli salmaqta Aıbek Іztileýov (Qazaqstan) pen Reze Azızıge (Iran) buıyrdy.
Áıelder arasynda altyn medaldi qazaqstandyq Aıjan Jylqybaeva (48 keli) men Raýza Nurmahammetova (56 keli), Darıa Kýzmıcheva (Reseı, 65 keli) jáne Shahnoza Bozorova (Ózbekstan, 77 keli) enshiledi.
Kúmis júldeni Ózbekstannan kelgen sportshylar Muhabbat ıAkýbova (48 keli), Nozıgúl Holmırzaeva (56 keli), qazaqstandyqtar Zarına Sarıpova (65 keli) jáne Zámzágúl Faızollanova (77 keli) aldy.
Tuǵyrdyń úshinshi satysyna 48 keli salmaq dárejesinde qyrǵyzstandyq Alıman Abdrashıtova men reıseılik Marta Tımoshenko, 56 keli salmaqta qyrǵyz balýany Sabına Jaanbekova men taǵy bir reseılik Anna Harıtonova, 65 keli salmaqta ózbekstandyq Malıkahon Kaharova men qyrǵyzstandyq Janar Joldosheva, al 77 kelide reseılik Irına Gromova men Qyrǵyzstan eliniń endi bir ókili Sanıet Talaıbekova kóterildi.
Jekpe-jek búgin de jalǵasady. Boz kilemde qalǵan salmaqtaǵy erler (60 keli, 74 keli, 90 keli jáne 100 keliden joǵary), áıelder (52 keli, 60 keli, 70 keli jáne 77 keliden joǵary) shyǵady.
Esterińizge sala ketsek, jarysqa álemniń 25 elinen 150-den asa sportshy qatysyp jatyr.
Buǵan deıin áıelder kúresinen jastar arasyndaǵy álem chempıonatyna kimder baratynyn jazǵan edik.