Qazaq kúresinen Aqtaýda ótetin chempıonatqa 500-ge jýyq balýan qatysady

14-16 qarasha aralyǵynda Aqtaý qalasyndaǵy «Halyq Arena» sport kesheninde qazaq kúresinen eresekter arasyndaǵy Qazaqstan Respýblıkasynyń chempıonaty ótedi. Chempıonatqa elimizdiń 17 oblysy men Astana, Almaty jáne Shymkent qalalarynan barlyǵy 500-ge jýyq balýan qatysady, dep habarlaıdy Kazinform.

«Halyq-Arena» sport kesheninde erler (55, 60, 66, 74, 82, 90, 100, +100, túıe balýan) men áıelder (48, 52, 56, 60, 65, 70, 77, +77) 8 salmaq dárejesinde beldesip, kil myqtyny anyqtaıdy.
Qatysýshylardyń arasynda búginde ulttyq qurama sapynda respýblıkalyq týrnırlerde sátti óner kórsetip, álemdik dodalarda el namysyn abyroımen qorǵap júrgen bilekti balýandar da bar.

Atap aıtar bolsaq, úsh kúnge sozylatyn birinshilik barysynda Jumajan Qojambekov, Bekjan Tólepov, Marat Nıgmatýllaev, Meıirjan Bereketov, Erjan Erenqaıypov, Mádı Amangeldi, Altynbek Aýsaǵıtov, Marat Baıqamurov, Nurdáýlet Jarylǵapov, Maqsat Isaǵabylov, Rýslan Ábdirazaqov, Raýza Nurmahammetova, Zarına Sarıpova, Roza Nysantaıqyzy syndy Álem jáne Azııa chempıonattarynyń, Álem jáne Azııa kýboktorynyń, Túrkııadaǵy Dúnıejúzilik Kóshpendiler oıyndarynyń, Saýd Arabııadaǵy Dúnıejúzilik jekpe-jek oıyndarynyń, «Dala qyrandary» jáne «Qazaqstan barysy» respýblıkalyq týrnırleriniń jeńimpaz-júldegerleri baqtaryn synaıdy.

Jarys nátıjesinde 2024-2025 jylǵy jańa maýsymdaǵy ulttyq qurama jasaqtalmaq.