Qazaq kúresinen ACh: Alǵashqy jarys kúni el qorjynyna 6 altyn medal tústi
ASTANA. KAZINFORM — Búgin Túrkistan tórindegi Olympic Center sport kesheninde eresekter arasynda tól sportymyz — qazaq kúresinen ótip jatqan Azııa birinshiliginyń alǵashqy kúni el qorjynyna alty altyn, 2 kúmis medal tústi.
Alǵashqy jarys kúni boz kilemde erler arasynda 55, 66, 82, 100 keli salmaqta, al áıelder 48, 56, 65, 77 keli salmaq dárejesinde kil myqtylar anyqtaldy.
Atap aıtsaq, erler arasynda 55 kel salmaqta Arhat Baımurzın alǵashqy altyn júldeni syılasa, 66 keli salmaqta Nurǵalı Tursynǵazıev ekinshi altyn júldeni syılady. Al 82 keli salmaqta synǵa túsken Asyljan Kárim men 100 kelide beldesken taǵy bir otandasymyz Erqanat Moldaǵulov birinen keıin biri el mereıin tasytyp, jeńis tuǵyrynyń eń bıik satysynan kórindi.
Áıelder arasynda synǵa túsken balýandarymyz arasynda 48 keli salmaqta el namysyn qorǵaǵan Aıdana Hasenqyzy men 77 keli salmaqta synǵa túsken arýymyz Arýjan Jandarbaı qarsylastarynyń barlyǵyn qapy qaldyryp, saryqurlyq dodasynyń chempıony ataǵyna qol jetkizdi.
Al 56 kelide synǵa túsken arýymyz Aqnur Asylbekova men 65 keli salmaqta beldesken Uldana Tańjaryqova ekeýi de fınalǵa deıin súrinbeı jetip, sheshýshi sátte Ózbekstannan kelgen qarsylastaryna utylyp, kúmis júldeni qanaǵat tutty.
Jeńimpaz atanǵan sportshylar 300 myń, kúmis júldeger atanǵan sportshylar 150 myń, al úzdik úshtikti túıindegen balýandarǵa 100 myń teńgeden qarjylaı syıaqy tabys etildi.
Endi erteń, ıaǵnı ekinshi jarys kúni balýandar erler arasynda 60, 74, 90, +100 keli salmaqta myqtylardy anyqtasa, al áıelder 52, 60, 70, +77 keli salmaq dárejesinde ózara úzdikterin iriktemek.
Aıta keteıik, Túrki dúnıesiniń rýhanı ordasyna aınalǵan qasıetti Túrkistan qalasynda bastaý alǵan saryqurlyq dodasyna Qyrǵyzstan, Tájikstan, Túrkimenstan, Úndistan, Japonııa, Iran, Mońǵolııa, Pákistan qatarly 15-ke jýyq memleketten 200-ge jýyq balýan qatysyp jatyr.
Esterińizge sala ketsek, osyǵan deıin Túrkistan órinde qazaq kúresinen Azııa birinshiligi bastalǵanyn habarlaǵan bolatynbyz.
Búgin Túrkistanda Azııalyq Qazaq Kuresi Assotsıatsııasy quryldy.