Qazaq kúresin jabyq ǵımarattaǵy Azııa oıyndarynyń baǵdarlamasyna engizý usynyldy

ASTANA. KAZINFORM — Qazaqstan qazaq kúresin jabyq ǵımarattaǵy Azııa oıyndarynyń baǵdarlamasyna engizý týraly ótinim berdi. Bul týraly QR Týrızm jáne sport mınıstri Erbol Myrzabosynov Ortalyq kommýnıkatsııalar qyzmetinde ótken baspasóz máslıhatynda málimdedi.

qazaq kúresi
Foto: Týrızm jáne sport mınıstrligi

Mınıstrdiń aıtýynsha, qazirgi ýaqytta Qazaqstanda sporttyń 11 ulttyq túri bar. Qazaq kúresi men toǵyzqumalaqtyń halyqaralyq deńgeıdegi tanymaldyǵy da artyp keledi. Atalǵan sport túrleri boıynsha federatsııalar álemniń 50-den astam elinde qurylǵan.

— Jaqyn ýaqytta elimizge Azııa Olımpıadalyq keńesiniń bas hatshysy keledi. Biz qazaq kúresin jabyq ǵımarattaǵy Azııa oıyndarynyń baǵdarlamasyna engizý týraly ótinim berdik, — dedi Erbol Myrzabosynov.

Sonymen qatar mınıstr toǵyzqumalaqtyń da el ishinde jáne shetelde belsendi damyp kele jatqanyn atap ótti. Bul sport túrinen álem jáne Azııa chempıonattary turaqty túrde uıymdastyrylady.

Vedomstvo basshysynyń sózinshe, aldaǵy ýaqytta toǵyzqumalaqty da halyqaralyq keshendi sport jarystarynyń baǵdarlamasyna engizý baǵytynda jumys júrgiziledi.

Buǵan deıin Qazaqstanda ulttyq quramalardy daıarlaýǵa 20 mlrd teńgeden astam qarjy bólingenin jazǵanbyz.