Qazaq kúresinen Azııa chempıonatynda Qazaqstan quramasy bas júldeni jeńip aldy
ASTANA. KAZINFORM — Búgin Túrkistan tórindegi Olympic Center sport kesheninde eresekter arasynda tól sportymyz — qazaq kúresinen ótip jatqan Azııa birinshiligi óz máresine jetti.
Jarystyń sońǵy kúni erler tórt salmaqta, áıelder tórt salmaqta ózara myqtyny anyqtady. Atap aıtsaq, búgin erler arasynda 60 keli salmaqta Nurtilek Qarakesekov qarsylastarynyń barlyǵyn qoǵadaı japyryp, jeńis tuǵyrynyń eń bıik satysyna kóterildi. Al 74 kelide el namysyn qorǵaǵan Tilek Toqtasynuly da qarsylatasryn ońaı jeńip, saryqurlyq chempıony atandy. Ókinishke qaraı, 90 keli salmaqta synǵa túsken balýanymyz Aıdar Beskempir ǵana jartylaı fınalda qarsylasyna jol berip, qola júldeni qanjyǵasyna baılady.
Asa aýyr salmaqta el namysyn qorǵaǵan Qaısar Shamshıdınov fınalǵa deıin súrinbeı jetti. Ol sheshýshi sátte tájikstandyq qarsylasyn qapy qaldyryp, Azııa chempıony atandy.
Al áıelder quramasynan búgin synǵa túsken balýandarymyz arasynda tek bir ǵana otandasymyzdyń mereıi ústep bolyp, saryqurlyq dodasynyń chempıony atandy.
Naqtyraq aıtsaq, +77 keli salmaq sanatynda el namysyn qorǵaǵan Araılym Shegenova bas júldeni enshilese, 52 kelide Saǵat Baıǵaraeva fınaldyq básekede Ózbekstannan kelgen qarsylasyna jol berip, kúmis júldege qol jetkizdi. 60 kelide Nazerke Asanhan jarysty qola medalmen aıaqtady. Al 70 kelide Aqbota Qydyráli fınalda taǵy bir ózbek qyzynan utylyp, kúmis júldemen shekteldi.
Osylaısha, qazaq kúresinen Azııa chempıonatynyń sońǵy kúni qazaqstandyq balýandar 4 altyn, 2 kúmis jáne 2 qola medal jeńip aldy.
Esterińizge sala keteıik, keshe Azııa birinshiliginiń alǵashqy kúni Qazaqstan quramasy 6 altyn, 2 kúmis medal jeńip alǵanyn jazǵan bolatynbyz.
Osylaısha, Qazaqstan quramasy 10 altyn, 4 kúmis jáne 2 qola medalmen jalpy komandalyq esepte kósh bastady. Ekinshi oryndy Ózbekstan quramasy enshilese, úshinshi orynǵa Qyrǵyzstan quramasy ıe boldy.
Ekinshi jarys kúniniń jeńimpaz-júldegerleri:
Erler:
60 kg
І oryn – Nurtilek KARAKESSEKOV KAZ
ІІ oryn – Tugol KANATBEK KGZ
ІІІ oryn – Ramziddin AZIZOV TJK
74 kg
І oryn – Tilek TOKTASSYNULY KAZ
ІІ oryn – Pouria Asadollah SHOKRI IRI
ІІІ oryn – Navruz KARIMZOD TJK
ІІІ oryn – Elbek TOJIEV UZB
90 kg
І oryn – Khaknazar NAZAROV TJK
ІІ oryn – Seyedmohammadreza SAEEDIMADANI IRI
ІІІ oryn – Dostonbek KHOLMAKHMADOV UZB
ІІІ oryn – Aidar BESKEMPIR KAZ
+100 kg
І oryn – Kaisar SHAMSHIDINOV KAZ
ІІ oryn – Dadakhon KURBONALIEV TJK
ІІІ oryn – Hamidreza Mohammadreza MALEKZADEH IRI
Áıelder:
52 kg
І oryn – Sitora ELMURODOVA UZB
ІІ oryn – Sagat BAIGARAYEVA KAZ
ІІІ oryn – Anjali ANJALIIND
60 kg
І oryn – Begai BEISHENAALY KGZ
ІІ oryn – Khurshida TUKHLIEVA UZB
ІІІ oryn – Nazerke ASSANKHAN KAZ
70 kg
І oryn – Sevinch TURAKULOVA UZB
ІІ oryn – Akbota KYDYALI KAZ
ІІІ oryn – Meena MEENA IND
+77 kg
І oryn – Arailym SHEGENOVA KAZ
ІІ oryn – Pokizakhon KAMOLDINOVA UZB
ІІІ oryn – Eesha Bharat PATIL IND