Qazaq kúresiniń ataýy ózgerýi múmkin

«Zertteý boıynsha qarasaq, Petropavl qalasynda 1928 jylǵa deıingi qujattardyń ishinde «qazaq kúresi» degen ataý joq ekendigin aıtqym keledi. «Qazaq kúresi» degen ataý kezinde «qazaqsha kúres» bolatyn. Al 2000 jyldan bastap qujattar «qazaq kúresi» dep daıyndalyp kele jatyr. Atap aıtqanda, 1928 jylǵa deıingi qujattarda bizdiń elimizdiń ishinde «kúres», «palýandyq kúres», «jekpe-jekke shyǵý», «kúsh synasý» degen ataýlar kezigedi. Buny aıtyp otyrǵan sebebim, endi biz álemdik deńgeıge shyqtyq. Álemdik deńgeıde dzıýdo kúres túri bar jáne jekpe-jekterdiń arasynda taekvondo, sondaı-aq basqa da dodalar bar. Bulardyń barlyǵy bir eldiń sport óneri bolsa da, biraq sol eldiń atymen atalmaıdy. Mysaly, japonnyń dzıýdo kúresi demeıdi, qysqa ǵana «dzıýdo» dep atalady»,-dedi qazaqtyń balýandyq ónerin zertteýshi Elemes Álimhanov.

Onyń sózine qaraǵanda, álemdegi keıbir túsinikter men tanymdar aıasynda qazaq kúresiniń ǵana damýyna (Olımpıada oıyndaryna engizý barysynda) keıbir sheteldik kedergiler bar.

«Bul ataýǵa baılanysty jaqsy oılastyrý kerek dep paıymdaımyn. Halqymyz bizdiń kóne balýandyq ónerdiń atyn qaıtaryp alsa»,-dep túıdi E. Álimhanov.

Osy oraıda QR Mádenıet jáne sport vıtse-mınıstri Tastanbek Esentaev ta óz pikirin bildirdi. «Ár eldiń óziniń kúresiniń ataýy bar. Endi biz Olımpıadalyq oıyndardyń baǵdarlamasyna engizý baǵytynda «qazaq kúresi» dep kirgizý óte qıyn. Sebebi, onda ózbekterdiń jáne qyrǵyzdardyń kúresi shyǵady. Jalpy bul ataýdy jaıdan-jaı ózgertý emes, sonymen qatar tek Olımpıada oıyndaryna ený úshin ózgerteıin dep jatyrmyz degen de durys bolmaıdy. Basty sebep - ulttyq kúrestiń burynǵy tarıhı ataýyna qaıtyp kelý. Sondyqtan biz qazirgi kezde «kúres» dep ataıtyn bolsaq, men óz basym qoldaımyn. Óıtkeni bizdiń kúrestiń damýyna kóp jeńildikter týady»,- dedi vıtse-mınıstr.

Sóz sońynda T. Esentaev qazaq kúresiniń ataýyna baılanysty ǵylymı túrde baǵa berilýi kerektigin atap ótti.