Qazaq kúresinen VII ÁCh: Talǵat Ámirenov Belarýs jerinde «altyn» aldy
ASTANA. QazAqparat - Mınsk tórinde qazaq kúresinen 7-shi álem chempıonatynan birinshi oryndy enshilegen Talǵat Ámirenov búgin Óskemen qalasyna keldi. Sportshyny jattyqtyrýshysymen qatar, óskemendik jankúıerleri qushaq jaıa qarsy aldy, dep habarlaıdy ShQO Dene shynyqtyrý jáne sport basqarmasynyń baspasóz qyzmeti.
Shyǵys óńiriniń palýany Talǵat Ámirenov beldesýge kelgende qarsylastyrnan bir bas joǵary ekendigin dáleldep, tuǵyrdyń eń bıik satysyna kóterildi.Ár memeleket úkilep qosqan kil myqtylar beldeskende júldeden árkimniń dámeli ekendigi belgili.
Sportshy +90 keli salmaqta el namysyn qorǵady. Aldyna kelgenniń bárinen aılasyn asyryp, álem chempıony atanǵan Talǵat Ámirenovti búgin óskemendikter úlken qoshemetpen qarsy aldy.
«Barlyq qarsylastarym shetinen myqty boldy. Degenmen, osy jeńiske jetýime sebepker bolǵan bapkerime, jankúıerlerge aıtar alǵysym sheksiz. Osy jeńispen shektelip qalamaı, aldaǵy kútip turǵan jarystarǵa daıyndyqty kúsheıtip, maǵan tileýlestik tanytqan jandardy taǵy da qýantqym keledi», - dedi Talǵat Ámirenov.
Talǵat Ámirenov barlyǵy 4 beldesý ótkizdi. Jartylaı fınaldyq básekede nıderlandııalyq palýannan aılasyn asyrsa, aqtyq synda kilem qojaıynyn, ıaǵnı belarýs palýanyn utty.
Odan bólek, Qazaqstan quramasy 60 kg salmaqta jáne áıelder arasynda altyn medalǵa ıe boldy.
Aıta keteıik, VII álem chempıonatyna barlyǵy 42 memleket qatysty.
