Qazaq kúresinen ótetin «Qazaqstan barysy» atty aqtyq saıysqa elimizdiń barsha óńirinen 64 balýan qatysady
ASTANA. 26 shilde. QazAqparat /Rýslan Ǵabbasov/ - Astanada qazaq kúresinen alǵash ret ótetin «Qazaqstan barysy» atty aqtyq saıysqa elimizdiń barsha óńirinen 64 balýan qatysady. Bul týraly búgin elordada atalǵan sporttyq sharaǵa baılanysty ótken baspasóz másıhatynda málim boldy.
«20 tamyzda bul tartysty doda Astanadaǵy syıymdylyǵy 4 myń adamdy quraıtyn «Dáýlet» sport kesheninde ótedi. Balýandar kúresiniń tikeleı kórsetilimin «Eýrazııa-birinshi kanaly» qamtamasyz etedi. Bul áleýmettik joba, ıaǵnı oǵan barlyǵy qatysýǵa múmkindik aldy»,-dedi «KTK» telearnasynyń Bas dırektory Arman Shoraev.
QR Týrızm jáne sport mınıstrligi Sport komıtetiniń tóraǵasy Elsııar Qanaǵatovtyń aıtýynsha, atalǵan joba aıasynda elimizdiń barlyq oblystary aýmaǵynda jáne Astana men Almaty qalalarynda irikteý saıystary ótti. Sonyń nátıjesinde jeńimpaz 64 balýan aqtyq saıysqa joldama aldy. «Bul turǵyda eń bastysy-biz osy balýandardyń arasynan «Qazaqstan barysyn» anyqtaıtyn bolamyz. Óz kezeginde osy shara qazaq kúresin nasıhattaýǵa molynan yqpal etedi»,-dedi komıtet basshysy.
Óz kezeginde Qazaqstan qazaq kúresi federatsııasynyń prezıdenti Serik Túkıev osy joba aıasynda elimizdiń túpkir-túpkirinen bilekti degen 74 keli salmaqtan joǵary balýandar qatysqanyn, sonyń nátıjesinde ár oblystan 4 balýan iriktelinip alynǵanyn jetkizdi. «Osy jarysymyz ádil ótedi dep senemiz. Sebebi, bul ulttyq kúresimizdiń damýyna sebepshi bolmaq»,-dedi ol.
20 tamyzdaǵy 64 balýannyń beldesýi «Kúsh atasyn tanymas» qaǵıdasy boıynsha ótedi, ıaǵnı salmaqqa shek qoıylmaıdy. Bas júldeger Altyn belbeý men 150 myń AQSh dollaryn ıelenedi. Al onyń jattyqtyrýshysyna 50 myń dollar tabys etiledi. Ekinshi oryndy jeńip alǵan balýanǵa 30 myń dollar beriledi (jattyqtyrýshysyna 10 myń dollar). Sondaı-aq úshinshi orynǵa taban tiregen balýanǵa 10 myń dollarǵa qol jetkizedi (jattyqtyrýshysyna 5 myń AQSh dollary).
Atap aıtqanda, júlde qoryndaǵy 200 myńnan astam AQSh dollaryn Qyzylorda oblysynyń ákimdigi, bıznes ókilder báıgege tigip otyr.
Sonymen qatar bul joba boıynsha bekitilgen talaptyń biri - 64 balýannyń árqaısysy ózimen birge túlkiniń nemese qasqyrdyń terisin kilemge alyp shyǵýy tıis. Jeńimpaz balýan qarsylasy alyp kelgen terini ıelenip otyrady. Nátıjesinde, qarsylastaryn tize búktirgen balýan atalǵan teriler men 150 AQSh dollaryn qanjyǵasyna baılaıdy.
