Qazaq kúresinen Mınskide ótken ÁCh-da top jarǵan Talǵat Ámirenovty jerlesteri kútip aldy
ASTANA. QazAqparat - Mınsk tórinde qazaq kúresinen 7-shi álem chempıonatynda birinshi oryndy enshilegen Talǵat Ámirenov búgin Óskemen qalasyna keldi. Sportshyny jattyqtyrýshysymen birge, óskemendik jankúıerleri qushaq jaıa qarsy aldy, dep habarlaıdy «QazAqparat» HAA tilshisi ShQO Dene shynyqtyrý jáne sport basqaramsynyń baspasóz qyzmetine silteme jasap.
Shyǵys óńiriniń balýany Talǵat Ámirenov qarsylastarynan bir bas joǵary ekendigin dáleldep, tuǵyrdyń eń bıik satysyna kóterildi. Ol chempıonatta +90 salmaqta el namysyn qorǵady. Bárinen aılasyn asyryp, álem chempıony atanǵan Talǵat Ámirenovty búgin óskemendikter qoshemetpen qarsy aldy. «Jeńiske jetelegen bapkerime, jankúıerlerime aıtar alǵysym sheksiz. Osy jeńispen shektelip qalmaı, aldaǵy kútip turǵan jarystarǵa daıyndyqty kúsheıtip, maǵan tileýlestik tanytqan jandardy taǵy da qýantqym keledi», - dedi Talǵat Ámirenov.
Aıta keterligi, qazaq kúresinen Mınskide ótken VII álem chempıonatyna barlyǵy 42 memleket qatysqan. Talǵat Ámirenov barlyǵy 4 beldesý ótkizgen. Jartylaı fınalda Talǵat Nıderlandy balýanynan aılasyn asyrsa, aqtyq synda Belarýs balýanyn utqan.
