Qazaq kúresinen Konfederatsııa kýbogynyń jartylaı fınalısteri anyqtaldy

ASTANA. QazAqparat - Astana qalasyndaǵy «Dáýlet» sport kesheninde «Konfederatsııa Kýbogy-2018» týrnıriniń qazaq kúresinen irikteý jarysy ótti, dep habarlaıdy QazAqparat tilshisi.

Sporttyq jekpe-jek jáne kúsh qoldanylatyn sport túrleri konfederatsııasynyń baspasóz qyzmeti málim etkendeı, jarysqa 10 komandadan 121 qazaq kúresiniń sheberi qatysty.

Komandalyq jarysta sportshylar boz kilemde 8 salmaq dárejesi, ıaǵnı  55 kg, 60 kg, 66 kg, 74 kg, 82 kg, 90 kg, 100 kg, +100 kg salmaqtarda beldesti.

Nátıjesinde, tórt toptan úzdikter irktelip, ár toptyń jeńimpazdary anyqtaldy. Osylaısha bıylǵy qazaq kúresinen konfederatsııa kýbogynyń jartylaı fınaldyq kezeńine tórt komanda joldama jeńip aldy.

Olar:

«A» toby - «Elorda batyry» SK (Astana q)

«B» toby - «Qazaq kuresi» SK (Almaty q)

«S» toby - «Qaraǵandy oblysy qazaq kúresi» SK (Qaraǵandy oblysy)

«D» toby - «ZAK KAR» qazaq kúresi SK (Qaraǵandy oblysy)

Esterińizge sala ketsek, alǵashqy jyly bes sport túrinen ótken bedeldi básekeniń baǵdarlamasyna 2017 jyly ulttyq kúres engizilgen bolatyn.  Іrikteýge segiz aımaqtan on klýb qatysyp, Almatynyń «Qazaq kuresi» sport klýby jeńimpaz atanǵan edi.

Konfederatsııa Kýbogy - barlyq 14 oblys pen respýblıkalyq mańyzy bar 3 qalanyń komandalary arasynda boks, grek-rım, erkin kúres, qazaq kúresi, dzıýdo jáne taekvondodan ótetin respýblıkalyq mańyzy bar týrnır. Bul saıystyń ereksheligi sol, sporttyń barlyq túrlerinen bolatyn fınaldyq oıyndardy kórermender bir mezette tamashalaı alady. Týrnır bıyl úshinshi márte jalaýyn kóterip otyr. Konfederatsııa Kýbogy 2016 jyldan bastap ótkizilip keledi.

Foto: confederation.kz