Qazaq kúresinen qaratuıaǵymnan hal ketkenshe ketpeımin - Aıbek Nuǵymarov
El birinshiliginde san márte top jarǵan ol Elbasy júldesi úshin dástúrli túrde uıymdastyrylyp kele jatqan «Qazaqstan Barysy-2013» týrnıriniń jeńimpazy. Bıyl Aıbek osymen jetinshi márte bedeli bıik dodada baq synaǵaly otyr. Osyǵan oraı balýannyń ózimen tildesip, bıylǵy dodaǵa daıyndyq barysymen tanysyp edik.
- Aıbek, «Qazaqstan barysy» týrnıri jaqyndap qaldy. Daıyndyǵyńyz qalaı?
- Óte jaqsy daıyndalyp jatyrmyn. Qazir Semeıdiń irgesinde bir aýylda jattyǵyp jatyrmyn. Bári jaqsy.
- Buıyrsa, jeńis tuǵyrynan kórinem degen úmittesiz ǵoı?
- Árıne, jeńis úshin jattyǵyp jatyrmyn. Jeńileıin dep eshkim jarysqa barmaıdy ǵoı. Bar maqsatym - jeńis tuǵyrynyń eń bıik satysynan kóriný.
- Osy balýandardyń ishindegi eń tájirıbelisi siz bolarsyz. Sebebi, osy týrnır bastalǵaly jyl saıyn qatysyp kelesiz...
- Qazaqta «baǵyń men babyń qatar shapsyn» degen ádemi sóz bar. Keıde qansha tájirıbeli bolsań da, baǵyń shappasa báribir sátsizdikke urynasyń. Biraq, negizinen tájirıbe birinshi orynda bolatyny sózsiz.
- Qarsylastaryńyzdyń barlyǵy ózińizge úırenshikti balýandar bolar?
- Solaı deýge bolady. Biraq, sońǵy jyldary ózge oblystardan myqty-myqty jas balýandar shyǵyp jatyr. Sondyqtan ońaı qarsylastar joq.
- Dese de, balýandardyń ishinde «osyny utsam ári qaraı ońaı bolar» degen basty qarsylasyńyz bar shyǵar?
- Joq, men úshin barlyq qarsylas birdeı. Áli kimmen beldesetinimiz de belgisiz. Jerebe tartylǵannan keıin baryp, naǵyz qarsylastarymyz týraly aıtýǵa bolady.
- 2013 jyly «Qazaqstan Barysy» ataǵyn jeńip alǵandaǵy qýanǵan sátińizdi áli umytpaǵan bolarsyz?
- Ol kún esten qalaı óshsin. Bıyl da sol jetistikti qaıtalap, taǵy bir márte shattyqtyń qushaǵynda terbelsem degen tátti armanym bar.
- Joǵary da aıtyp óttik,bıyl týrnırge jetinshi márte qatysqaly otyrsyz. Osy aralyqta tóreshilerdiń sheshimine narazy bolǵan sátterińiz boldy ma?
- Joq. Tóreshiler jolymdy bógep, bura tartqan emes. Alty jyldyń bireýinde chempıon bolsam, qalǵan beseýinde ózimniń jibergen qatelikterimnen qarsylastaryma ese jiberdim. Bıyl sol qatelikterge boı aldyrmaı, ketken esemdi qaıtaratyn bolamyn.
- Beıbit Ystybaev úsh dúrkin «Barys» atansam boldy dep edi. Atandy, bıyl óz erkimen qatysýdan bas tartypty. Al sizde neshe dúrkin chempıon ataný josparyńyzda bar?
- Men osyǵan deıin ózime ondaı naqty talap qoımappyn. Ózim sportqa keshigip kelgenmin. 17 jasymda úlken sportty bastadym. Endi sporttan keshigip ketpesem degen oıdamyn. Qazaq kúresinen qaratuıaǵymnan hal ketkenshe ketpeımin. Men - qazaq kúresine keshigip kelsem de álemdi tórt ret baǵyndyrǵan jalǵyz qazaqpyn. Maqsatym - qazaq kúresin álemge tanytý.
- Áńgimeńizge rahmet! Sáttilik bolsyn...
