Qazaq kúresinen «Eýrazııa Barysy» ótedi

Buǵan deıin halyqaralyq týrnır retinde ótken jarys osymen besinshi ret jalaýyn jelbiretpek. Úsh jyl Taraz qalasynda uıymdastyrylǵan  «Eýrazııa Barysy» bıyl ekinshi ret ońtústik astanada ótkizilgeli otyr.

Jyl saıyn dástúrli jarysqa Grýzııa, Mońǵolııa, Reseı, Polsha, Túrkııa, Qyrǵyzstan taǵy basqa kóptegen eldiń bilekti balýandary baq synap keledi. Sonyń ishinde Qazaqstan quramasy atalmysh komandalyq jarysta úsh ret top jardy, tek 2014 jyly ǵana Mońǵolııa quramasy qarsylas shaq keltirmedi.

Bıyl «Eýrazııa Barysyna» Brazılııa, Japonııa jáne Kamerýn elderi tuńǵysh ret qatysady. Sonymen qatar, jarysqa Ózbekstan, Túrkııa jáne Qazaqstannyń qos komandasy baq synaıdy.

Qatysýshylar arasynda nátıjeli sportshylar az emes. Sambodan álem chempıony Paata Gvınıashvılı (Grýzııa), D.Altangerel Mońǵolııanyń ulttyq kúresi boıynsha «Arystan» ataǵynyń ıegeri, bıyl Astanada ótken qazaq kúresinen álem chempıonatynyń kúmis júldegeri R.Sonmes (Túrkııa), qazaq kúresinen kóptegen halyqaralyq jarystardyń júldegeri jáne kýrashtan álem chempıony Mýhsın Hısomıddınov (Ózbekstan), dzıýdodan Japonııa chempıony K.Tanııý jáne taǵy basqalary bar.

Qazaqstan komandasy bıyl eki qurammen boz kilemge shyǵady. Balýandar Almatyda eki aptalyq oqý-jattyǵý jıynyn ótkizýde. Jıyn qorytyndysy boıynsha bapkerlik keńes «Eýrazııa Barysyna» qatysatyn sportshylardy anyqtaıdy.  

«Eýrazııa Barysynda» ár komandada segiz balýannan kúresedi. Sportshylar 55 kg, 60 kg, 66 kg, 74 kg, 82 kg, 90 kg, 100 kg jáne +100 kg salmaq dárejeleri boıynsha myqtyny anyqtaıdy.

Dástúr boıynsha jarystyń qomaqty júlde qory bar.

І oryn - 10 000 000 teńge

ІІ oryn - 6 000 000 teńge

ІІІ oryn - 4 000 000 teńge

 «Eýrazııa Barysy» Qazaqstan aımaǵynda «Qazaqstan» jáne «Qazsport», Túrkııanyń «TRT Avaz» telearnalarynda tikeleı efırde kórsetiledi. Sonymen qatar, Reseıdiń «Boks TV» jáne «Match! Planeta» telearnalarynyń efırinen de qaıtalanady.