Qazaq kúresinen bıyl úsh eldiń balýandary tuńǵysh ret Azııa chempıonatyna qatysady
ASTANA. QazAqparat - Erteń Astanada Qazaq kúresinen ótetin Azııa chempıonatyna tuńǵysh ret Shrı-Lanka, Japonııa, Iran elderiniń balýandary qatyspaq. Bul týraly OKQ-da ótken baspasóz máslıhatynda Qazaq kúresi halyqaralyq qaýymdastyǵynyń prezıdenti Qanat Bozymbaev málim etti, dep habarlaıdy QazAqparat tilshisi.
«Jyl saıyn Qazaq kúresi halyqaralyq federatsııasynyń bastamasymen aıtýly dodalar ótkizilip keledi. Bıyl da osy dástúrden jańylmaı, úlken jarysty ótkizemiz dep otyrmyz. Kúni erteń tuńǵysh ret Qazaq kúresinen Astanada Azııa chempıonaty ótedi. Chempıonatta Qazaqstan sortshylarymen birge Mońǵolııa, Tájikstan, Túrikmenstan, Pákistan, Ózbekstan, Shrı-Lanka, Japonııa, Iran, Qyrǵyzstannan keletin sportshylar ózara baq synasady. Erteńgi Azııa chempıonatyna tuńǵysh ret Qazaq kúresinen Shrı-Lanka, Japonııa jáne Iran sekildi elderdiń balýandary qatysqaly otyr», - dedi Qanat Bozymbaev.
Eske sala ketsek, buǵan deıin 26 tamyzda Astanada «Dáýlet» sport kesheninde Qazaq kúresinen Azııa chempıonaty ótetinin habarlaǵan bolatynbyz. Chempıonatqa 11 memleketten 77 sportshy qatyspaq. Balýandar 8 salmaq jáne absolıýttik dáreje boıynsha synǵa túsedi. Jalpy chempıonattyń júlde qory 20 myń AQSh dollaryna baǵalanýda. Ár salmaq dárejesi boıynsha jarys jeńimpazdaryna 1000 dollardan tabystalady, al kúmis júldegerge 500, «qolaǵa» 300 dollardan beriledi. Absolıýttik salmaq dárejesi boıynsha altyn medal ıegerine 3000 dollar, «kúmiske» 1500 dollar, qola júlde ıesine 1000 dollar tabystalady.
Astanada ótetin Azııa chempıonatynda el namysyn 9 balýan qorǵaıdy.
