Qazaq kúresinen Azııa chempıonaty: Túrikmenstan balýany óz salmaǵynda top jardy

ASTANA. QazAqparat - Qazaq kúresinen Azııa chempıonatynda 74 kelilik dıvızıonda túrikmenstandyq balýan qarsylas shaq keltirmedi, dep habarlaıdy QazAqparat tilshisi.

Chempıon atanǵan Ahmet Nazarov fınalda Qyrǵyz Respýblıkasynan kelgen Ápsamat Mátqasymovpen básekege túsken. Qarsylasy edáýir boıshań bolsa da, Nazarov múlt ketpeı, jeńis tuǵyryna kóterildi.

74 kelige deıingi salmaqta úshinshi orynǵa Mońǵolııa balýany Pýrevdava Bat-Erdene men Qazaqstan balýany Naýryzbek Maılashev ıe boldy.

Aıta ketsek, osyǵan deıin Azııa chempıonatynda 4 salmaq boıynsha birinshi oryn 2 qazaq jáne 2 mońǵol balýandarynyń enshisinde ketti.

Eske sala ketsek, Elordadaǵy «Dáýlet» sport kesheninde Qazaq kúresinen Azııa chempıonaty ótip jatyr. Azııa chempıonatynda 11 elden 77 balýan 8 salmaq dárejesi boıynsha synǵa túsýde. Chempıonatta Qazaqstan sortshylarymen birge Mońǵolııa, Tájikstan, Túrikmenstan, Pákistan, Ózbekstan, Shrı-Lanka, Japonııa, Iran, Qyrǵyzstan, Úndistannan kelgen sportshylar ózara baq synasty. Jalpy chempıonattyń júlde qory 20 myń AQSh dollaryna baǵalanýda.