Qazaq kúresinen Álem chempıonatynda elimizdiń sportshylary barlyq 5 altyndy enshiledi
ASTANA. 23 jeltoqsan. QazAqparat - 21-22 jeltoqsan kúnderi Belarýs astanasy Mınsk qalasynda qazaq kúresinen álem birinshiligi ótti. Osymen tórtinshi ret uıymdastyrylǵan dúbirli dodaǵa 28 memleketten 58 balýan qatysty. 5 salmaq dárejesi boıynsha synǵa túsken Qazaqstan quramasy barlyq altyn júldeni oljalap qaıtty, dep habarlady Baq.kz.
60 keli salmaqta el namysyn qorǵaǵan Abzal Arystanbekov alǵashqy altyn júldeni qorjynǵa saldy. Onyń aqtyq aıqastaǵy qarsylasy qyrǵyz eliniń ókili Sanjar Ospanálıev boldy. 70 kelide bozkilemge shyqqan Erlan Estek armıandyq balýan Armen Nazarıandy taza utyp, Abzaldyń jeńisti jolyn laıyqty jalǵastyra bildi. Al 80 kelide synǵa túsken Ersin Muhamedjanov Grýzııa memleketiniń ákki balýany Besarıon Berýlavýdyń jaýyrynyn jerge tıgizip, altyn medalsyz qaldyrdy.
Al 90 keli salmaqtaǵy Muhıt Tursynov talaı alyptardyń mysyn basyp júrgen tisqaqqan balýan. Jýyrda Taraz qalasynda tuńǵysh ret uıymdastyrylǵan «Eýrazııa barysy» halyqaralyq týrnırinde Muhıt mońǵolııalyq balýan Serik Báıkemuratqa ese jibergen bolatyn. Mine, Mınsk tórinde ótken álem chempıonatynda Muhıt óz myqtylyǵyn dáleldep, Alpamys Týkeevti qapyda qaldyrdy.
Al 90+ salmaq dárejesinde alyptar aıqasynyń kórkin «Qazaqstan barysy-2013» týrnıriniń jeńimpazy Aıbek Nuǵymarov pen Belarýs eliniń úkili úmiti Evgenıı Bedýlın qyzdyrdy. Tartysty ótken jekpe-jek nátıjesinde Aıbektiń aıy ońynan týyp, el qorjynyna besinshi altyn medaldi salyp berdi.
Sonymen, sarapqa salynǵan 5 altyn medal qazaq balýandarynyń qanjyǵasynda ketti. Altyn júldege qol jetkizgen sportshylarǵa 1000 AQSh dollarynan berilse, kúmis jáne qola júldege qol jetkizgen balýandarǵan 500 jáne 300 dollardan úlestirildi.
