Qazaq kúresinen ÁCh: Jarystyń ekinshi kúni el sportshylary 5 «altyn» jeńip aldy

ASTANA. QazAqparat – Astanada ótip jatqan qazaq kúresinen álem chempıonatynyń ekinshi kúni qazaqstandyq palýandar bes altyn jáne bir kúmis medal jeńip aldy.

Bul týraly QazAqparat tilshisi «Qazaq kuresi» qaýymdastyǵynyń baspasóz qyzmetine silteme jasap habarlaıdy.

Jeńimpazdar alty salmaq dárejesinde óner kórsetti. Olardyń arasynda jeńis tuǵyranan kóringenderdiń tórteýi – erler bolsa, eki medaldi qorjynǵa áıelder quramasynyń ókilderi saldy.

Saıystyń ekinshi kúni Bekhan Tólepov (55 kg), Nur Amanshuqyrov (66 kg), Jumajan Qojambekov (74 kg), Raýza Nurmahametova (55 kg) men Zarına Zarıpova (65 kg) tuǵyrdyń joǵary satysyna kóterildi. Al 60 keli salmaq dárejesinde boz kilemge shyqqan qazaqstandyq palýan Marat Nyǵmatýlaev kúmis medal enshiledi.

Eske sala keteıik, chempıonatqa álemniń 40 elinen 350 balýan qatysyp jatyr. Jarystyń alǵashqy kúni el sportshylary 3 altyn medal jeńip alǵan edi.

Foto: www.instagram.com/qazaqkuresi.kz