Qazaq kúresinen 2012 jylǵy «Qazaqstan barysynyń» esimi 15 qyrkúıekte belgili bolady
ALMATY. 7 naýryz. QazAqparat - Ult kóshbasshysy Nursultan Nazarbaevtyń júldesi úshin qazaq kúresinen ótetin «Qazaqstan barysy» jarysy óz jalǵasyn tabýda.
2011 jyly bastalǵan bul jobanyń basty maqsaty - balýandardyń áleýmettik jaǵdaıyn jaqsartyp, tól sportymyzdyń órisin keńeıtý jáne onyń Olımpıada oıyndary baǵdarlamasyna enýine yqpal etý.
Joba sheńberinde bıyl da oblystar men Astana jáne Almaty qalalarynda irikteý jarystary ótedi. Onda úzdik shyqqan balýandar 15 qyrkúıekte Astanada «Qazaqstan barysy» ataǵyn ózara sarapqa salady. «Kúsh atasyn tanymas» degen qaǵıda boıynsha ótetin bul dúbirli dodada jeńimpaz bas júldege tigilgen taıtuıaq pen altyn belbeýdi jáne 150 myń AQSh dollaryn ıelenedi. 2-3 oryn alǵandar kúmis jáne qola belbeý taǵyp, qomaqty qarjylaı syılyqty ıemdenedi.
Dástúrli bul jarysty uıymdastyrýshylar - Mádenıet jáne aqparat mınıstrligi, Sport jáne deneshynyqtyrý isteri agenttigi, Qyzylorda oblystyq ákimdigi, «Qazaqstan barysy» Qazaq kúresin damytý qoǵamdyq qory, «KTK» telearnasy men QR Qazaq kúresi federatsııasy. Byltyr QR táýelsizdiginiń 20 jyldyǵyna oraı 20-tamyzda ótken básekede qyzylordalyq Ulan Rysqul aqtyq synda jambyldyq Beıbit Ystybaevty utyp, «Qazaqstan barysy» atanǵan bolatyn.
