Qazaq kúresin Olımpıada oıyndaryna qosqymyz keledi - Bozymbaev

ASTANA. QazAqparat - Astanada ótip jatqan qazaq kúresinen álem chempıonatynyń resmı ashylýy ótti, dep habarlaıdy QazAqparat tilshisi.

Ashylý saltanatyna Qazaq kúresi halyqaralyq federatsııasynyń prezıdenti  Qanat Bozymbaev, QR Mádenıet jáne sport mınıstrligi Sport jáne dene shynyqtyrý isi komıtetiniń tóraǵasy Elsııar Qanaǵatov qatysyp, sportshylarǵa sáttilik tiledi.

Alǵashqy bolyp sóz alǵan Elsııar Qanaǵatov tól sportymyzdan ótip jatqan álem birinshiliginiń resmı túrde bastalǵanyn jarııalady.

«Búgin ózderińiz kórip otyrǵandaı elordamyzda tól sportymyzdan álem birinshiligi ótip jatyr. Men QR Mádenıet jáne sport mınıstrliginiń atynan jarysqa kelgen barlyq balýandarǵa alǵysymdy bildire otyryp, barshalaryńyzǵa sáttilik tileımin. Biz osyndaı jarystar uıymdastyrý arqyly qazaqtyń tól sportyn búkil álemge nasıhattap jatyrmyz. Bul qazaq sportyn, sonyń ishinde qazaq kúresin damytý baǵytynda jasalyp jatqan tyń qadamdardyń biri», - dedi Elsııar Qanaǵatov.

Qazaq kúresi halyqaralyq federatsııasynyń prezıdenti Qanat Bozymbaev óz kezeginde qazaq kúresiniń kún ótken saıyn tanymaldyǵy artyp kele jatqanyn basa aıtty.

«Búgingi tańda qazaq kúresiniń kún sanap tanymaldyǵy artyp keledi.  2016 jyldan bastap ıÝNESKO ony materıaldyq emes mádenı mura tizimine engizgen. Bıyl tuńǵysh ret jabyq ǵımaratta ótetin Azıada oıyndarynyń baǵdarlamasyna enip, úsh salmaq boıynsha chempıondar anyqtaldy. Endi, aldaǵy ýaqytta jazǵy Azııa oıyndary, ary qaraı Olımpıada oıyndarynyń baǵdarlamasyna engizýdi maqsat etip otyrmyz», - dedi Bozymbaev.

Esterińizge sala keteıik, búgin jalaýy jelbiregen qazaq kúresinen ótip jatqan álem chempıonatyna 40 memleketten 166 balýan baq synap jatyr.