Qazaq kúresin Olımpıada oıyndaryna engizý josparly túrde atqarylady
ASTANA. QazAqparat - Qazaq kúresin Olımpıada oıyndaryna engizý jospary quryldy. Bul týraly búgin Astanada ótken baspasóz máslıhatynda QR Sport jáne dene shynyqtyrý isteri agenttiginiń tóraǵasy Tastanbek Esentaev málim etti.
Qazaq kúresin nasıhattaý barysynda ótken jyldary eleýli sharalar ótkenin eske salyp ótken agenttik basshysy: «Eń basty maqsatymyz qazaq kúresin Azııa oıyndarynyń jáne Olımpıada oıyndarynyń baǵdarlamasyna kirgizý. Bul bastama úshin jaýapkershilik ala otyryp, keıingi urpaqqa jol ashyp bergimiz keledi. Qazaq kúresi Olımpıada oıyndaryna kiretin bolsa, sonyń ózi úlken jeńis bolyp tabylady», - dedi.
Osy oraıda T.Esentaev ulttyq sportty damytýda tıisti josparlar qurylǵandyǵyn atap ótti.
«Qazaqstan boıynsha erkin kúres sportshylarynyń sany jıyrma bir myńnan astam, al grek-rım kúresimen aınalysatyndar on eki myńnan asady. Atap aıtqanda, qazaq kúresimen shuǵyldanatyn sportshylar sany otyz bes myń. Sondyqtan qazaq kúresin damytý úshin óńirlerdegi sport mektepteri ishinen bólimderin ashýǵa oblystarǵa tapsyrma berip otyrmyz jáne ony qadaǵalaımyz»,- dedi tóraǵa.
Esterińizge sala keteıik, byltyrǵy jyldyń aıaǵynda birqatar elderdiń qatysýymen qazaq kúresinen «Eýrazııa Barysy» І halyqaralyq týrnıri uıymdastyrylǵan bolatyn.
Aıta keteıik, qazaq kúresinen «Qazaqstan Barysy» jyl saıynǵy týrnıri bıyl tórtinshi ret uıymdastyrylyp otyr. Naýryzdyń basynan beri elimizdiń eldi mekenderinde irikteý jarystary júrip jatyr.
