Qazaq kúresimen aınalysatyndar sany 4 esege ósti - Arman Shoraev
NUR-SULTAN. QazAqparat – Qazaq Kuresi federatsııasynyń burynǵy basshysy Arman Shoraev ulttyq kúrestiń damýy týraly pikir bildirdi, dep habarlaıdy Qazaqparat tilshisi.
«2010 jyly «Qazaq Barysy» jobasyn jańadan bastaǵanda 20 myńǵa jýyq adam aınalysatyn. Búginde bul kórsetkish tórt esege artty. Buryn qazaq kúresi dzıýdo, erkin kúres syndy ózge sporttyń kóleńkesinde edi. Ata-analar bizdiń sport túrine balalaryn bergisi kelmeıtin. Biraq, úlken júldeli jobalardyń paıda bolýy arqyly ulttyq kúresti damyta aldyq», - dedi Arman Shoraev Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, qazirgi ýaqytta qazaq kúresiniń jeńimpazdary Beıbit Ystybaev, Aıbek Nuǵymarov Ulan Rysqulov el arasynda óte tanymal.
«Olardyń júldeli marapattary da olımpıada chempıondarynan kem emes. Sondyqtan, biz óz sporttyq oıynymyzdy ózge kúrestermen teńdestire aldyq. Alda da mańyzdy jumystar kútip tur», - dedi A. Shoraev.
Eske sala ketsek, búgin QR Aqparat jáne qoǵamdyq damý mınıstri Dáýren Abaev Qazaq Kuresi federatsııasynyń basshysy atandy.
