Qazaq kúresi tuńǵysh ret Azııa oıyndarynyń baǵdarlamasyna engizildi
ASTANA. QazAQparat - Balýandarymyz tuńǵysh ret qazaq kúresinen jabyq Azııa oıyndarynda óner kórsetedi, dep habarlaıdy QazAqparat tilshisi.
Túrkmenstannyń astanasy Ashhabadta 17-27 qyrkúıek aralyǵynda ótetin V jabyq Azııa oıyndarynda qazaq kúresinen úsh salmaq dárejesinde balýandarymyz el namysyn qorǵaıdy.
Olar: Qasymhan Túlenbaev (70 kg), Ádiljan Ystybaev (90 keli) jáne Aıbek Nuǵymarov (+90 kg).
Osy oraıda aıta keteıik, tól kúresimizdi osy jarysqa qosý máselesi ótken jyly Túrkııanyń Ystanbul qalasynda kúres túrleri jóninde ótken forýmda sheshilgen bolatyn.
Al bıyl Búkilálemdik kúres odaǵynyń (United World Wrestling) prezıdenti Nenad Lalovıch pen Azııa Olımpıada keńesiniń prezıdenti Sheıh Ahmed ál-Fahad ál-Ahmet ál-Sabah ulttyq kúresimizdi 2017 jylǵy Azııa oıyndarynyń baǵdarlamasyna engizý kelisimine qol qoıdy.
