Qazaq kúresi mektepterde fakýltatıvtik sabaq bolyp engizilse - D.Qaletaev

ASTANA. QazAqparat - Qazaq kúresiniń damýy memlekettik deńgeıde qaralýy tıis. Bul týraly búgin Ortalyq kommýnıkatsııalar qyzmetindegi baspasóz máslıhatynda «Samuryq-Qazyna» ulttyq ál-aýqat qorynyń jurtshylyqpen baılanys jónindegi bas dırektory Darhan Qaletaev málim etti.

«Qazaq kúresin Olımpıada oıyndaryna engizýge tyrysýdamyz jáne osy baǵytta qajetti is-qımyldardy júzege asyrý qajet. Mysaly, japonnyń sýmo kúresi Olımpıadaǵa kirmese de, ony búkil álem tamashalaıdy. Dál sondaı deńgeıge biz de jetsek, óte jaqsy bolar edi. Jalpy, úkimette júrgen aǵalarymyz qazaq kúresin Olımpıadaǵa engizý máselesin kótergen bolatyn, alaıda bul baǵytta qyrýar jumys jasaý kerek»,- dedi QR Qazaq kúresi federatsııasynyń prezıdenti Arman Shoraev.

Óz kezeginde «Samuryq-Qazyna» ulttyq ál-aýqat qorynyń jurtshylyqpen baılanys jónindegi bas dırektory Darhan Qaletaev qazaq kúresiniń damýy memlekettik deńgeıde qaralýy tıis ekenin atap ótti.

«Múmkin, bólek baǵdarlama retinde mektepte bir fakýltatıvtik sabaq bolyp kirgizilse degen oıdamyn. Sporttyń bul túri Qazaqstan boıynsha jaqsy damyp kele jatyr. Meniń oıymsha, bizdiń quzyretti organdar osyǵan mán berý kerek»,- dedi.

Budan bólek «Nur Otan» partııasynyń hatshysy Qumar Aqsaqalov qazaq kúresiniń halyqaralyq deńgeıde jaqsy nasıhattalyp jatqandyǵyna toqtala kele: «Bizdiń eń joǵary maqsatymyz - ulttyq sportymyzdy Olımpıadaǵa deıin jetkizý», - dedi.