QAZAQ KÚRESІ: «Qazaqstan Barysy» týrnıriniń fınalyna shyqqan balýandar anyqtaldy

Erteń, 22 mamyr kúni saǵat 11:00-de Respýblıkalyq sport kolledjiniń zalynda elimizdiń eń úzdik 33 balýanyn tanystyrý rásimi ótedi. «Shyǵys Barysy», 2013 jylǵy jeńimpaz Aıbek Nuǵymarov pen «Taraz Arlany», 2012 jylǵy chempıon Beıbit Ystybaev jobanyń fınaldyq synyna qatarynan tórtinshi ret joldama alyp otyr.

Elimizdiń 16 aımaǵynda respýblıkalyq dodaǵa irikteý kezeńi aıaqtaldy. Tórtinshi maýsymdaǵy irikteý syny kóptegen tosyn syılarǵa toly boldy. Atap aıtar bolsaq, jarystyń ardager balýany Murat Keńtonov (Qostanaı oblysy) pen tuńǵysh «barys» Ulan Rysqul (Qyzylorda oblysy) fınaldyq synnan syrt qalsa, jaraqatyna oraı Maksım Gerber (Qostanaı oblysy) men Vıktor Demıanenko (Almaty qalasy) týrnırge qatysa almaıdy. Al tájirıbeli balýan Shalqar Jolamanov bir jyldyq úzilisten soń jobaǵa qaıta oraldy.

Alaıda, bıylǵy jarysqa qatysatyn jas ári jańa esimder óte kóp. Olar qazaq kúresinen ótetin eń iri sporttyq dodanyń tarıhynda óz esimderin qaldyrýǵa daıyn.

Tanystyrý rásimi barysynda BAQ ókilderiniń árbir balýanmen suhbattasyp, foto jáne beınematerıal jınaqtaýyna múmkindik bar. Sondaı-aq, jıynda «Qazaqstan Barysy» jobasynyń tórtinshi maýsymyna irikteý kezeńi qorytyndylanady.

Esterińizge sala keteıik, «Qazaqstan Barysy» jobasynyń bıylǵy fınaldyq syny 29 maýsym kúni Astanadaǵy «Saryarqa» velotreginde ótedi ( bastalýy - 13:00). Bıletter satylymǵa aǵymdaǵy jyldyń 1 maýsymynan bastap túsedi. Jeńimpazǵa altyn belbeý, Taıtuıaq jáne 150 myń AQSh dollary tabystalady, dep habarlaıdy «Qazaqstan Barysy» qazaq kúresin damytý qory.