Qazaq kúresi boıynsha «Almaty barysy» týrnıriniń jeńimpazyna avtokólik syılanady
ALMATY. QazAqparat - Almatyda qazaq kúresi boıynsha ótkiziletin «Almaty barysy» týrnıriniń jeńimpazyna avtokólik tabys etiledi.
Bul týraly búgin Almatyda ótken baspasóz máslıhaty barysynda Almaty qalalyq Dene shynyqtyrý jáne sport basqarmasynyń basshysy Naıl Nurov málim etti.
«Almaty barysy» týrnırine qalanyń ár aýdanynan 3 balýannan, ıaǵnı barlyǵy 24 úmitker qatysady. Báriniń de salmaǵy 90 keliden joǵary. Al buǵan deıin aýdandyq jarystarǵa 200 balýan qatysqan bolatyn.
«Týrnırde Qazaqstannyń eń úzdik sýdıalary tóreshilik etedi. «Almaty barysy» týrnıriniń jeńimpazyna avtokólik syıǵa tartylady. Odan basqa, fınalǵa shyqqan eki balýan da «Qazaqstan barysy» respýblıkalyq týrnırine qatysady. Jarys barysynda kórermenderdiń qurmetine kontserttik baǵdarlama uıymdastyrylady. Sondyqtan, almatylyqtar bul sporttyq sharaǵa búkil otbasymen kelýine bolady», - dep sózin aıaqtady Dene shynyqtyrý jáne sport basqarmasynyń basshysy.
Eske sala ketelik, «Almaty barysy» týrnıri aldaǵy 2 mamyr kúni Balýan Sholaq atyndaǵy sport saraıynda ótedi.
