Qazaq KSR-niń eńbek sińirgen ártisi Edýard Málbekov dúnıeden ozdy
ASTANA. KAZINFORM — Mádenıet jáne aqparat mınıstrligi Qazaq KSR-niń eńbek sińirgen ártisi Edýard Málbekovtiń dúnıeden ótýine baılanysty týǵan-týystary men jaqyndaryna, áriptesteri men shákirtterine qaıǵyra kóńil aıtty.
Mınıstrliktiń málimetinshe, Edýard Jabashuly sanaly ǵumyryn ónerge arnaǵan kórnekti balet ártisi, horeograf, pedagog ári tálimger boldy. Onyń esimi otandyq balet óneriniń qalyptasýy men damý tarıhynda aıryqsha oryn alady. Óner jolynda ol «Spartak», «Baqshasaraı burqaǵy», «Jızel», «Aqqý kóli», «Don Kıhot», «Mahabbat týraly ańyz», «Karmen-sıýıta» sekildi klassıkalyq jáne ulttyq qoıylymdarda basty partııalardy oryndap, qazaq balet ónerinde ózindik qoltańbasyn qaldyrdy.
Edýard Jabashuly horeografııalyq bilim berý salasynyń damýyna da súbeli úles qosty. Ustazdyq jolynda birneshe býyn ónerpazdy tárbıelep, úlken shyǵarmashylyq mektep qalyptastyrdy. Onyń kóptegen shákirti búginde Qazaqstanda jáne shetelde otandyq balet ónerin laıyqty tanytyp júr. Bıik kásibı sheberligi, talapshyldyǵy, ónerge adaldyǵy men shákirtterine degen qamqorlyǵy keıingi býynǵa ónege bolyp qaldy.
— Edýard Jabashulynyń jarqyn beınesi, ǵıbratty ǵumyry men ulttyq mádenıetke sińirgen eleýli eńbegi týǵan-týystarynyń, áriptesteri men shákirtteriniń, barsha ónersúıer qaýymnyń jadynda máńgi saqtalady. Marqumnyń jany jánnattan jaı taýyp, ımany salamat, jatqan jeri jaryq, topyraǵy torqa bolsyn! — delingen habarlamada.
Buǵan deıin Aqyn Bekjan Áshirbaev 52 jasqa qaraǵan shaǵynda dúnıeden ozǵanyn jazdyq.
