Koreıalyq KIND kompanııasy Alataý qalasyn damytýǵa qatysýy múmkin
ASTANA. KAZINFORM – Memleket basshysy KIND korporatsııasynyń prezıdenti jáne bas dırektory Kım Bok Hvandy qabyldady, dep jazdy Aqorda.
Prezıdent Qasym-Jomart Toqaev Koreıanyń sheteldik ınfraqurylym jáne qala qurylysy jobalaryn damytý korporatsııasy (KIND) qazaq-koreı ınvestıtsııalyq yntymaqtastyǵyn ilgeriletýde mańyzdy ról atqaratynyna toqtaldy.
Memleket basshysynyń aıtýynsha, elimiz Úlken Almaty aınalma avtokólik jolyn salýǵa úles qosqan korporatsııamen yqpaldastyqty jalǵastyrýǵa múddeli.
Áńgimelesý barysynda KIND korporatsııasynyń Alataý qalasyn damytýǵa qatysý perspektıvasyna basa nazar aýdaryldy.
Prezıdent jobanyń áleýeti zor ekenin atap ótip, koreı tarapy jańa shahardaǵy ınfraqurylymdyq jáne ınvestıtsııalyq bastamalarǵa belsendi atsalysatynyna senim bildirdi.
Sondaı-aq Memleket basshysy korporatsııany Qazaqstandaǵy áleýmettik jáne kólik ınfraqurylymyn jańǵyrtý josparyn júzege asyrý isine qatysýǵa shaqyrdy.
Kım Bok Hvan Qazaqstan Eýrazııanyń mańyzdy kólik-logıstıka toraby retinde aıryqsha ról atqaratynyn atap ótip, eki eldiń ekonomıkalyq yntymaqtastyǵyna nyǵaıtýǵa daıyn ekenin jetkizdi.
Qasym-Jomart Toqaev pen Kım Bok Hvan qazaq-koreı birlesken ınvestıtsııalyq qoryn qurý máselelerin talqylady. Atalǵan qor elimizdegi ınfraqurylym jáne energetıka jobalaryna koreı kapıtaly men tehnologııasyn tartatyn tıimdi tetik bolmaq.
Sonymen qatar kezdesýde korporatsııanyń kólik-logıstıka júıesin jańǵyrtýǵa, sonyń ishinde Aqtaý, Quryq porttaryn damytý, óńirlik áýejaılardy salý men jańartý múmkindigi qarastyryldy.
Kezdesý sońynda Caspian Group jáne KIND arasyndaǵy ózara túsinistik týraly memorandým, Alatau City Authority men KIND arasyndaǵy Alatau Smart City jobasynyń bas josparyn ázirleý týraly kelisim, Qazaqstan Investment Corporation men KIND arasyndaǵy strategııalyq kelisim sekildi qujattarmen almasý rásimi ótti.
Aıta keteıik, Prezıdent Hanwha Group kompanııasyna Qazaqstanda birlesken jobalardy júzege asyrýdy usyndy.
