Qazaq konservatorııasy álemniń úzdik shyǵarmashylyq JOO-men kelisim jasasty

ASTANA. KAZINFORM — Qazaq ulttyq konservatorııasy álemniń eń úzdik shyǵarmashylyq joǵary oqý oryndarynyń birimen memorandýmǵa qol qoıdy, dep habarlaıdy Mádenıet jáne aqparat mınıstrliginiń baspasóz qyzmeti.

Qurmanǵazy atyndaǵy Qazaq ulttyq konservatorııasy álemdegi úsh úzdik shyǵarmashylyq oqý oryndarynyń biri «University of Music and Performing Arts Vienna» Vena mýzyka jáne sahnalyq óner ýnıversıtetimen yntymaqtastyq týraly memorandýmǵa qol qoıdy. Bul ýnıversıtet ǵasyrlar boıy álemdik óner men akademııalyq dástúrdiń qalyptasýyna yqpal etip keledi. Qazirgi kezde bilim ordasynda mýzyka, teatr jáne kıno salalary boıynsha 3000-nan astam stýdent pen oqytýshylar bar.

Memorandým aıasynda taraptar shyǵarmashylyq kadrlardy kásibı daıarlaý salasynda uzaq merzimdi akademııalyq yntymaqtastyqty damytý, sondaı-aq halyqaralyq bilim berý jáne mádenı baılanystardy nyǵaıtý boıynsha kelisimge keldi.

— Qujat birneshe negizgi baǵyttardy qamtıdy. Solardyń biri — akademııalyq utqyrlyqty damytý. Vokal, kompozıtsııa, operaǵa dırıjerlik etý jáne aspaptyq oryndaý (skrıpka, fortepıano, úrmeli aspaptar jáne perkýssııa) salalarynda shyǵarmashylyq yntymaqtastyq múmkindikteri qarastyrylǵan. Sonymen qatar mýzykataný, etnomýzykataný jáne mádenıet menedjmenti salasy boıynsha birlesken ǵylymı zertteýler júrgizý josparlanǵan. Yntymaqtastyq aıasynda stýdentter men oqytýshylardy halyqaralyq baǵdarlamalarǵa, onyń ishinde International Summer Academy mdw-ge qatystyrý josparlanǵan, — dep túsindirdi mınıstrlik.

Budan bólek bilim berý, óner jáne mádenıet salasyndaǵy uzaq merzimdi jobalardy iske asyrý múmkindigi talqylanyp jatyr.

Osydan buryn Qazaq ulttyq óner akademııasynyń stýdenti Belarýstegi halyqaralyq baıqaýda jeńimpaz atanǵanyn jazǵanbyz.