Qazaq kókparshylary búgin qarsylastaryn iri eseppen oısyrata utty
ASTANA. QazAqparat - Búgin Astanadaǵy «Qazanat» atshabarynda kókpardan I álem chempıonatynyń úshinshi kúni óz máresine jetti, dep habarlaıdy QazAqparat tilshisi.
Oıyn qorytyndysy boıynsha Mońǵolııa komandasy Ózbekstan quramasyn 8:4 esebimen utsa, Qyrǵyzstan kókparshylary túrkııalyqtardy 13:3 esebimen oısyrata jeńdi. Al tájik kókparshylary AQSh quramasyn 9:2 esebimen qapy qaldyrsa, Aýǵanstan kókparshylary ázerbaıjandyqtardy 3:0 esebimen basym tústi. Al búgin asa tartysty ótken dodada qazaqstandyq kókparshylar reseılikterdi 15:3 esep aıyrmashylyǵymen oısyrata jeńse, QHR quramasy Vengrııany 8:2 esebimen qapy qaldyrdy.
Kókparshylardyń arasyndaǵy tartys erteń saǵat Astana ýaqytymen saǵat 10:00-de jalǵasatyn bolady. Onda alǵashqy kezdesý Mońǵol Respýblıkasy men Túrkııa arasynda ótedi.
Aıta keteıik, jarysqa álemniń 11 memleketinen 200-ge jýyq kókparshy qatysýda. Jerebe nátıjesinde «A» tobyna Qyrǵyzstan, Túrkııa, AQSh, Ózbekstan, Mońǵolııa jáne Tájikstan synǵa túsip jatsa, «V» tobynda Qazaqstan, Ázerbaıjan, Reseı, Vengrııa, Qytaı men Aýǵanstan ózara myqtylardy anyqtaýda. Jarystyń jalpy júlde qory - 18 mln teńge. I oryn - 10 mln teńge, II oryn - 5 mln teńge, III oryn - 3 mln teńge.
Esterińizge sala keteıik, kókpardan I álem chempıonatyn QR Mádenıet jáne sport mınıstrligi, QR «Ulttyq sport túrleri qaýymdastyǵy» uıymdastyryp otyr.
