Qazaq qoǵamynda jańa qaǵıdattar jáne jańa baǵdarlar saltanat qurýǵa tıis - Memleket basshysy
«Azamattarymyz reformalarǵa qoldaý bildiredi dep senemin. Aıtylǵan barlyq reformalardyń, ózgeristerdiń tabysty júzege asýy barshamyzdyń birligimizge, otanshyldyǵymyzǵa jáne azamattyq jaýapkershiligimizge baılanysty» - dedi Prezıdent.
Sonymen qatar Qasym-Jomart Toqaev ult sapasyn arttyrý taqyrybyna toqtaldy.
«Qazirgi mindet – halqymyzdyń jańa bolmysyn qalyptastyrý, tutas ult sapasyn arttyrý. Adamdy jáne qoǵamdy ýaqyt talabyna saı jetildirý qajettigin ómirdiń ózi kórsetip otyr. Jańarǵan ult qana jańǵyrǵan eldiń jetistigin jahan jurtyna tanyta alady. Men halqymyzdyń álem úlgi tutarlyq jaqsy qasıetteriniń kóbirek bolǵanyn qalaımyn. Ultymyz jańa sapaǵa kóshýi úshin bizdiń kúndelikti ómirlik ustanymdarymyz da ózgerýi kerek. Qazaq qoǵamynda jańa qaǵıdattar jáne jańa baǵdarlar saltanat qurýǵa tıis», - dedi Memleket basshysy.
Osy oraıda Q. Toqaev 21 ǵasyrdyń urpaǵy tereń bilimdi bolýy tıis ekenin atap ótti.
«Ekinshiden, jas býyndy erinbeı eńbek etýge beıimdeý qajet. Úshinshiden, kez kelgen isti kásibı daǵdy arqyldy júzege asyrǵan durys. Tórtinshiden, temirdeı tártip jáne joǵary jaýapkershilik barshamyzdyń boıymyzda bolýy kerek. Besinshiden, ádildikten aınymaǵan jón. Ádildik – qoǵam damýynyń mańyzdy sharty. Ádilettilik – ásirese, el-jurttyń taǵdaryn sheshý úshin asa qajet qasıet. Altynshydan, bizge keregi adaldyq, uqyptylyq, tııanaqtylyq. Bárimiz naǵyz qazaqty dál osyndaı keıipte kórgimiz keledi. Biz sonda ǵana básekege qabiletti memleket, zııatker ult qalyptastyra alamyz. Qazaq zııalylarynyń jańa kezeńdegi mindeti – ult bolmysynyń jańa qaǵıdattaryn ornyqtyrý, sondaı-aq ult sapasyn arttyrýǵa atsalysý», - dedi Prezıdent.
Memleket basshysy jańǵyrǵan qoǵam jat ádetterden birtindep arylýy kerektigin aıtty.
«Ysyrapshyldyq pen dańǵazalyq qoǵamnyń da, adamnyń da abyroıyn tógedi. Jaýapsyzdyq, nemquraılylyq búkil eldi qasiretke ushyratady. Al bos sózdilik pen bóspelik, maqtanshaqtyq qoǵamnyń damýyn tejeıdi», - dedi Memleket basshysy.
