Qazaq qoǵamyn ultsyzdanýdan qorǵaýymyz kerek - Atyraý oblysynyń ákimi
ASTANA. QazAqparat - Atyraý oblysynyń ákimi Nurlan Noǵaev qazaq qoǵamyn ultsyzdanýdan qorǵaýymyz kerek dep málimdedi.
Aımaq basshysy bul týraly oblysta ótken Jumeken Nájimedenov atyndaǵy respýblıkalyq oqýlary kezinde aıtty, dep habarlaıdy QazAqparat oblys ákiminiń baspasóz qyzmetine silteme jasap.
"Aramyzda dástúrin, mádenıetin umytyp bara jatqan azamattar bar. Biz ul-qyzdarymyzdy ultsyzdanýdan qorǵaýymyz kerek. Al, bul protseske tótep beretin birden-bir nárse - rýhtyń bıiktigi. Jastar rýhqa azyq bolatyn halqynyń muralarynan únemi nár alyp otyrýy qajet", - dedi Nurlan Noǵaev.
Aıta ketelik, Jumeken Nájimedenov atyndaǵy respýblıkalalyq kórkem sóz oqý sheberleri saıysy oblysta bıyl birinshi ret ótkizilip otyr.
Baıqaý qorytyndysy boıynsha, atyraýlyq úmitker Názıra Áshim birinshi oryndy enshilese, Aqmola oblysynan kelgen Perızat Muratqyzy men mańǵystaýlyq Aıdos Jumabaev júldeli ekinshi oryndy jeńip aldy. Al, atyraýlyq Nurdáýlet Tabyldıev, Shyǵys Qazaqstannan kelgen Araıly Altaeva, Ońtústik Qazaqstannan qatysqan Nazerke Quljabaeva úshinshi oryndy ózara bólisti.
Talapkerlerge QR Memlekettik syılyǵynyń ıegeri, jazýshy Qajyǵalı Muhanbetqalıuly, Halyqaralyq «Alash» ádebı syılyǵynyń ıegeri, aqyn Serik Turǵynbekuly, QR Prezıdenti syılyǵynyń laýreaty, jazýshy Mereke Qulkenov, fılologııa ǵylymdarynyń doktory, aqyn Qadir Júsip jáne Atyraý oblystyq mádenıet, muraǵattar jáne qujattama basqarmasynyń basshysy Ábil Jolamanov qazylyq etti.
Jumeken Nájimedenov - Qazaqstan Respýblıkasy Memlekettik ánurany mátininiń avtory, kórnekti aqyn, Qazaqstan Jastar odaǵy syılyǵynyń ıegeri.
